Yela 9 - mzwDBL

Jaama kpɔe dɛ́ tɛ Korowii o waa bola aŋwɛnɛ ta

Kooro Devid yel

¹ N Naa Korowii, mɛɛ kpɛɛre n bambile bwa nee, mɛɛ bol nyokpowaa haa ɛa bwaa.

² He nomanta, mɛɛ ɡo silɛɛ yelaa, dɛ́ hɛɡre. Nemenɛ Korowii, mɛɛ kpɛɛ he sɔnee yela ne.

³ N dɔma nae naa, dɛ ba laa berɛ, dɛ́ choɡli dɛɛ serewe.

⁴ He waa dɔ kasinteŋ, dɛ bol n waa tɛ mɛ aŋwɛnɛ ta, he soɡe he kookara ta, dɛ bol n waa tɛ mɛ n di bole.

⁵ He pa voɡtoroma bolchɔɡe, dɛ chɔɡ nyubinikpeɡ tena, dɛ ɡel ba sɔna he harɛ nɔ ta kwaraa.

⁶ Ya dɔma heo, yaa ba waa lii kpa. He chɔɡ ba bwɛjena, ya soh ba waa kwaraa.

⁷ Kɛ hen Korowii, he dɛ di kora saŋ bɛlbwa. He kpɔ he kookara cheɡ, dɛɛ ba ba waa bola.

⁸ Hɛɛ bol harɛ nɔ ta nɛra waa a toɡre, dɛ di kora aŋwɛnɛ ta.

⁹ Hen Korowiirii nɛra baa dɛ ɛɛ ba hɔhɔrɔwa la chwa baa marɛ. He do kɛ dekpeɡ waa balaa, nɛra chwa baa jo he be.

¹⁰ N Naa Korowii, nɛra baa jemɛ kɛrɛdɛ bwa ɛɛ yaradae, haa banɔ la baa dɛ nyin he bɔr la vɛh.

¹¹ Hé ɡo yela kpɛɛ Korowii waa dɛ di kora Saayɔn. Hé bol waa waa ɛa harɛre nɛra bwa be.

¹² Hen Korowii dɛ lii nɛra ba bwara aa dɛ nyɛɡ ba wa, haa wii baa dɛ wi waa soh. He dɛ tɛr nɛra baa dɛ ɛ ɡɛ nɛra wechɔɡa la deŋne.

¹³ N Naa Korowii, na ɡɛ n dɔma aa cheɡɛ n nɛ, dɛ ɡel n bwara ɛɛ nyɛɡ! Sune n nɛ, dɛ́ lɛɛ mɛ le seo ta,

¹⁴ ásɛ n che Jerusalam tena bwa sie, dɛ́ bol ba be waa bwa haa ɛa. Mɛɛ hɛɡroo, lɛɛ haa lɛɛ mɛ la wa.

¹⁵ Voɡtoroma kwi nafuɡe, dɛ ɡbaɡba le o ta, ba ɡbaɡba bel laɡ ba.

¹⁶ Hen Korowii cheɡɛ bole haa dɛ pa a toɡre la ta, dɛ ɡel nɛra jemɛ, nyubinikpeɡ tena ɡbaɡba we-ɛɛla laɡ ba.

¹⁷ Seo chɔ le dɛɛ kpa nyubinikpeɡ tena, banee harɛre nɛra baa vɛh hen Korowii toma la.

¹⁸ Hen Korowii aa nɛra baa wola komɛlbwa dɔe waa soh. He ta ɡelɛ nyaara hwɛɡa ɛɛ ta pɛɛ bwa.

¹⁹ N Naa Korowii, ir nyu ne. Bɛ ɡel nɛwɛnyini nyiŋi he nyubaah. Ba voɡtoroma ne he sie, dɛ́ pa ba bolchɔɡe.

²⁰ N Naa Korowii, aah ba, ɡel ba jemɛ kɛŋɔ nɛwɛnyinaa ban.