Yela 89 - mzwDBL

Kooro Devid ne Korowii fɔo baa fɔwa

Esera te Etan yel

¹ N Naa Korowii, mɛɛ ɡo he nyina aa wola jaɡa dɔe bwa la yelee dɛɛ bol he waa aa dɔ kasinteŋ la saŋ bɛlbwa.

² Mɛɛ boloo ŋɔ he nyina aa wola jaɡa dɔe bwa, cheɡɔ kiŋkiŋ saŋ bɛlbwa dɛɛ la. He waa dɔ kasinteŋ saŋ bɛlbwa, ɡɛ nyundua aa lole saŋ bɛlbwa la.

³ He ŋɔ, “N ne nɛn maa leo tɛ n te la fɔwɛ fɔo. N baɡɛ n bonɔɔ Kooro Devid nyoa ŋɔ,

⁴ ‘He naanaree mɛɛ ba ɡela bá di kora saŋ bɛlbwa, dɛ́ ɡel he kora che kiŋkiŋ, ka tel he naanar baa ka ba bwa nɛ.’ ”

⁵ Kwaa aa lɔ nyundua dɛ kpɛɛ he nyokpowe-ɛɛla, nyundua toroma ɡe ɡo yela dɛɛ kpɛɛ he kasinteŋ haa dɔa.

⁶ N Naa Korowii, nomɛlbwa toole dɛ do nyundua kɛ hen, koŋkwaa aa lɔ nyundua la bini bɛlbwa ta hen tele.

⁷ Nyundua toroma bwa chemaa, hen Korowiirii do ɔma kohona, a bwa dɛ ɔmɛ, dɛ kpɔ duure dɛɛ tɛɛ.

⁸ Korowii Waa Ɛ Koranar Bwa Kooro, umee dɔ kpeɡri kɛ hen ɔ? N Naa Korowii, he waa dɔ kasinteŋ wobɛlbwa ta.

⁹ Mpo nehɛma dɛ ta kohona naa, henee dɛɛ di kpeɡri o ta, he wono ɡel wɛɛ hel.

¹⁰ He kpo oljen waa lɔ mpo ta, he kpeɡri nee he pɔ he dɔma nɛ.

¹¹ Nyundua ne harɛ bwa ɛ he kwa, henee ta harɛ ne komɛlbwa aa lɔ o ta.

¹² Henee ta weekaŋle nyunduabɔr, ne weekaŋle harɛbɔr. Tabɔ ne Hɛmɔn Bwejena ɡo yela dɛɛ kpɛɛre kɛŋɔ nɛra aa dɛ ɡo yela ken.

¹³ He kpeɡri kan, he dɔ bokpeɡa ɡe kohona!

¹⁴ Waa aa toɡra ne waa bola dɛ́ pa bole aŋwɛnɛ ta, nee hɛɛ di kora. Nɛnnyin ne kasinteŋ ɡboo he kpɔ dɛɛ ɛ he wa.

¹⁵ Nɛra baa ɡo yela dɛɛ kpɛɛre, ne banɔ la baa dɛ valɛ bɔr waa chaah he sie la, ba na som.

¹⁶ Ba dɛ hɛɡre he waa saŋ bɛlbwa, dɛɛ kpɛɛre toɡra haa toɡra wa.

¹⁷ Henee tɛɛ ba he kpeɡri ne jirima kohona, he cheɡɛ he nyina ta dɛ ɡel ya pɔ ya dɔma nɛ.

¹⁸ N Naa Korowii, henee dɛɛ tɔ yaa ɡbemɡbe, henee Israel Nɛŋɡoroŋ, dɛ le ya kooro tɛ yaa la.

Korowii nyoa waa baɡɛ Kooro Devid

¹⁹ N Naa Korowii, saŋ la he pili he waa bini baɡle he nɛndɛɛɡa ŋɔ, “N tɛ banyoo bɛl kpeɡri, n kpɔ kora tɛ nɛn maa leo cheɡ le nɛra bini.

²⁰ N fuɡe noo aa do ɡoroŋ do n bonɔɔ Devid nyu ta, dɛ cheɡo kora ta.

²¹ Mɛɛ ja o nɛɛ saŋ bɛlbwaa, dɛ́ chao dɛɛ tɛo bokpeɡa.

²² O dɔma aa won yoo, dɛ́ lawɔ do ba lɔɡa, nyubinikpeɡ te bɛlbwa aa won pɔ o nɛ.

²³ Mɛɛ lɔ o dɔmaa bil, dɛ́ kpo nomɛlbwa waa haoh.

²⁴ N nyina aa wola jaɡa dɔe la nee mɛɛ ba o nyina, ásɛ o che n sɔn ta pɔ o bala nɛ.

²⁵ Mɛɛ ɡeloo o harɛ do kan, le Mɛdetereenea Mpo ta ba kaa Yufretis Moo ta.

²⁶ Devid ɛɛ yer mɛɛ ŋɔ, ‘Henee n Mɛɛ ne Korowii maa dɛ tomɛ, he do kɛ Bwetal maa chwaa baa marɛ hɛɛ lɛɛ mɛ.’

²⁷ Mɛɛ leo cheɡ tɛ n te kɛ n bibanloɡle, ó ɡwaa koranar bwa baa lɔ harɛ nɔ ta.

²⁸ Mɛɛ ɡeloo n nyina do o nɛɛ saŋ bɛlbwa, ásɛ n ne o fɔo yaa fɔwɛ la bɛ chɔɡ bwa.

²⁹ O naanar ɛɛ dɛɛ di koraa saŋ bɛlbwa dɛɛ la. O kora dii ɛɛ cheo kiŋkiŋ saŋ bɛlbwa, ɡɛ nyundua aa lole saŋ bɛlbwa nɔ.

³⁰ Kɛ dɛ o naanar vɛh me Mmarare ta teŋa, dɛ vɛh ɡɛ maa do ba a ta,

³¹ dɛ laa sie kpɔ waa maa chaɡ ba ta, baa men Mmarare ta teŋɛ aa,

³² mɛɛ tɛr ba deŋnee ba wechɔɡa baa ɛa waa, ba bwara ɛɛ nyɛɡ ba a waa.

³³ Kɛ maa Devid nyinaa ɡel bwa, kɛɛ dɛ́ vɛh n ne o baah fɔo la.

³⁴ Maa n ne o fɔo yaa fɔwa laanee chɔɡ, kɛɛ dɛ́ charɛ nyoa maa baɡɔ la beŋkpoŋ kwara.

³⁵ N berɔ ŋwɛɛ n sɔn waa do ɡoroŋ, maa wola nyoa berɛ, maa Devidii neɡre bwa,

³⁶ wɛɛ dɔ naanaree saŋ bɛlbwa, mɛɛ nyiŋi o harɛ taa ó che kiŋkiŋ saŋ bɛlbwa kɛŋɔ wee aa dɛ chaah saŋ bɛlbwa nɔ.

³⁷ O kora ɛɛ cheo kiŋkiŋ saŋ bɛlbwa dɛɛ la ɡɛ korobie aa lɔ nyundua saŋ bɛlbwa nɔ, dɛ́ ɛ danseɛ.”

Kooro dɔma aa yoo dɛ pɔ o nɛɛ wiile

³⁸ He baah di kooro haa leo cheɡ tɛ he te la nɛ, he berɛ habɔɔ kpoo dɛ vɛoh.

³⁹ He chɔɡ he ne he bonɔɔ fɔo haa fɔwa la, dɛ kpɔ o kooɡbɛrɛ ta harɛ.

⁴⁰ He kuuɡi o bwɛjen danjwɛɛre bwa, o danjwɛkpeɡa bwa chɔ harɛ.

⁴¹ Nɛra baa vala baa kaa bwa dɛ ŋwɛ o laala, o bala bwa dɛ mamɔ.

⁴² He ɡelɔ o dɔma pɔ o nɛ, dɛ ɡel ba bwa sie lɛ.

⁴³ He ɡelɔ o dɔmkwaa ɛ pɛɛpɛɛ, dɛ ɡel ba pɔ o nɛɛ laa ta.

⁴⁴ He laa o koodaŋɡbala lɛ, dɛ lɛ o kora o be.

⁴⁵ He teŋe o bonɔɔne saŋ tɔpere ta, dɛ ɡel o di ncho.

Korowii lɛɛ wesoŋa

⁴⁶ N Naa Korowii, saŋ besoo hɛɛ ba he te sɔeh ka tel ɔ? Saŋ besoo he baah ɛɛ ba dii kohona dɛɛ la ɡɛ nɔ?

⁴⁷ Jemɛ kɛŋɔ nɛn mkpa aa jaŋɛ bɛlbwa. Lii kɛŋɔ he ta yaa ya ɛ nɛwɛnyina yaa dɛ ba wona sewɛ.

⁴⁸ Umee dɛ́ so le waa wola sewɛ bwa nɔ? Nɛwɛnyinii ume, dɛ́ ŋɔ, waa lalbɔɔ binii kaa lɔ?

⁴⁹ N Naa Korowii, he nyina o fa aa kana la sɛ? Nyoa he fa aa baɡɛ Devid la ɡe sɛ?

⁵⁰ N Naa Korowii, lii men maa ɛ he bonɔɔ wa, n bwara dɛ nyɛɡ bammuɡla ne chɛɡa nɛra aa dɛ chɛɡ mɛ.

⁵¹ He dɔma dɛ chɛɡre kooro haa leo cheɡ la. Bela waa kpɔ bwa, ba dɛ chɛɡro.

⁵² Hé kpɛɛ Korowii saŋ bɛlbwa dɛɛ la! Aamen!