Yela 88 - mzwDBL

Chae wesoŋa

Kora dea bii yel

¹ N Naa Korowii, henee ɛ n Lɛɛ, chɔɔ ne jwaana bwaa n kpɔ n wii dɛɛ bil he sie.

² No n wesoŋa, cheɡ deŋne, dɛ́ no n wii maa dɛ wi, dɛ́ cha mɛ.

³ N dɛ na wahala kohona, a ɡelɔ a ka tama n sewɛ.

⁴ N do kɛŋɔ nɛn waa dɛ ba sewa, n bokpeɡa bwa tonɔ.

⁵ He kur mɛ ja nɛra baa serewa nɛ, n do kɛ nɛra baa serewa chɔ lalbɔɔne bini. Nɛra hen Korowii aa soh ba waa kwaraa, haa wola won cha ba la ken.

⁶ He taɡ mɛ ta lalbɔɔ waa luŋa ne biro kohona bini.

⁷ He bandia ɡwaa n nɛɛ kohona, dɛ ba tɔ n nɛɛ kɛŋɔ mpo nehɛma ken.

⁸ He ɡelɔ n chamene tena chwa mɛ, baa n siwi ɡba nyin dɛ́ na. N do kɛ maa le bel ta, maa wola won chwa.

⁹ Suna dii ɡelɔ mɛɛ ba nyoŋa. N Naa Korowii, tɔpere bɛlbwaa n wi dɛɛ yerɛ, n ɡɔɔ nɔɔra dɛɛ soŋe.

¹⁰ He dɛ ɛ nyokpowe-ɛɛla nɛra baa serewa bini naa? Baa won ir che dɛ́ kpɛɛre.

¹¹ Ba dɛ bol he nyina aa wola jaɡa dɔe la waa lalbɔɔ bini, kɛɛ he kasinteŋ waa la lalabwɛ aa?

¹² Ba dɛ na he nyokpowaa biro ta bela, kɛɛ he wedɛɛɡa lalabwɛɛ bela baa dɛ soh wobɛlbwa nɔ naa?

¹³ N Naa Korowii, n wio dɛɛ noe kɛ he cha mɛ, chɔɔ bɛlbwaa n kpɔ n wesoŋa dɛɛ bil he sie.

¹⁴ N Naa Korowii, ɛrɛɛ he berɛ habɔɔ kpo mɛ, dɛ laa sie kpɔ n nɛɛ nɔɔ?

¹⁵ Le n bechale saŋ bwaa n bwara wee mɛ, a ka tama n sewɛ. N ɡwɛɡrɔ dɛ le deŋnetɛra haa kpɔa ba ta n nɛɛ mɛɛ di suna la wa.

¹⁶ He bandia kohona la ɡwaa n nɛ, he yoi haa dɛ yoo mɛ chɔɡ mɛ.

¹⁷ Saŋ bɛlbwaa ba bar mɛ dɛɛ cheme kɛŋɔ nee aa sua ken, ba le baŋ bɛlbwa ta dɛ baa tɔ n nɛ.

¹⁸ He ɡelɔ n daamanar tenten ne nɛra baa dɛ nyin mɛ ɡba chwa mɛ, biro ɡboo berɛ n dam name.