Yela 86 - mzwDBL

Chae wesoŋa

Kooro Devid yel

¹ N Naa Korowii, no n wesoŋa dɛ́ chaŋ mɛ, n ɛ nyaa dɛ ɛ nɛŋɡwɛɡre.

² N kpɔ n te tɛɛ nomanta, kpɔ nɔn tɔ n nɛ. Henee Korowii maa dɛ tomɛ, anomanta, lɛ men maa ɛ he bonɔɔ dɛɛ hwɛɡɛ he nɛɛ nɔ.

³ N Naa Korowii, na n sum dɛkalkɛ saŋ bɛlbwaa n wi dɛɛ noe.

⁴ Tɛ men maa ɛ he bonɔɔ silɛɛ, dɛkalkɛ he siee n kpɔ n wesoŋa dɛɛ bil.

⁵ N Naa Korowii, he waa wer tɛ yaa, kpɔ ya wechɔɡa dɛɛ kɛ yaa, he kpɔ he nyina aa wola jaɡa dɔe, dɛɛ nyin nɛra baa wia dɛɛ yerɛ bwa.

⁶ N Naa Korowii, no n wesoŋa, no n suna wii, dɛ́ cha mɛ.

⁷ N wio dɛɛ noe n wenaale tɔpere, dɛkalkɛ henee dɛ́ chaŋ mɛ.

⁸ N Naa Korowii, voɡa nɛra aa dɛ tomɛ ta kpeɡri dɔe kɛ hen, nomɛlbwa ta he we-ɛɛla dɔŋa ɛɛ bwa.

⁹ Harɛre nɛra haa ta ba bwa ɛɛ ba he siee, dɛ́ ba ɡuŋi, dɛ́ kpɔ jirima tɛ he sɔn haa dɔa.

¹⁰ He kpeɡri dɛɛ ɛ nyokpowa, he ɡboo ɛ Korowii.

¹¹ N Naa Korowii, chaɡ mɛ he ŋwɛnɛ, ásɛ n tomɛ kasinteŋ ne. Gel n kpɔ bambibeŋkpoŋ tomɛ, dɛɛ ɔmɛ he sɔn.

¹² Korowii maa dɛ tomɛ, mɛɛ kpɛɛre n bambile bwa nee, dɛ́ kpɔ jirima tɛ he sɔn saŋ bɛlbwa dɛɛ la.

¹³ He nyina aa wola jaɡa dɔe la kan tɛ mɛ! He lɛɛ mɛ le seo nyoa.

¹⁴ N Naa Korowii, nyubinikpeɡ tena ne mbarafo tena dɛ yoo mɛ. Ba pɛ nyoa dɛɛ nyin mɛ dɛ́ kpo, baa hen komɛl yerɛ.

¹⁵ Kɛ hen Korowii te, he dɔ tedoma tɛ nɛra, dɛɛ nyin ba. He baah aa di warawara, he waa dɔ kasinteŋ, hɛɛ nyin nɛn.

¹⁶ Berɛ sie n be, dɛ́ na n sum. Tɛ men maa ɛ he bonɔɔ bokpeɡa. Lɛɛ mɛ, dɛkalkɛ n tomɛ n bambile bwa ne.

¹⁷ Gel n na waane, á baɡle kɛŋɔ he waa wer tɛ mɛ, ásɛ n dɔma na sihiih kpo ba, dɛkalkɛ henee cha mɛ dɛ larawe n bwara.