Yela 85 - mzwDBL

Deŋnesɔɔhna wesoŋa

Kora dea bii yel

¹ N Naa Korowii, he sune he harɛ nɛra nɛ, he berɔ ɡel Israel tena wobɛlbwa maɡre tɛɛ ba.

² He kpɔ he nɛra wechɔɡa baa dɛ ɛ kɛ ba, he tɔ ba wechɔɡa ta.

³ He ta ɡelɛ he baah di ba nɛ, he laa he bandia kohona kpɔ ba nɛ.

⁴ Ya naa Korowii haa ɛ ya Lɛɛ, berɛ ɡel ya wobɛlbwa do wer tɛ yaa, bɛ ɡel he baah di ya nɛɛ kpa.

⁵ He baah ɛɛ di ya nɛɛ saŋ bɛlbwaa dɛɛ la ɡɛ naa? He bandia nyoa aa sɔɔh bwa naa?

⁶ Berɛ tɛ yaa bokpeɡfala ja, ásɛ yan yaa ɛ he nɛra nɔ kpɛɛre.

⁷ N Naa Korowii, chaɡle he nyina aa wola jaɡa dɔe la ya nɛ, ásɛ dɛ lɛ yaa.

⁸ N dɛ no waa Korowii aa dɛ bol la, o baɡɛ yaa nyoa ŋɔ, dɛ ya ta berɛ kaa ya ɡɛne we-ɛɛla ta naa, wɛɛ tɛ yaa deŋnesɔɔhnaa.

⁹ Kasinteŋ, nomɛlbwa waa dɛ tomɔ la, wɛɛ lɛo, ásɛ o jirima do ya harɛ nɔ ta.

¹⁰ Korowii nyina ne o kasinteŋ do kɛŋɔ nɛra banɛ aa chema ken, asɛ waa aa toɡra ne deŋnesɔɔhna ɡe ɛ beŋkpoŋ.

¹¹ Nɛra ba wa aa dɔ kasinteŋ harɛ ta ɛɛ dɛɛ nyiŋi Korowii, ásɛ Korowii che toɡra waa toɡra ta le nyundua dɛɛ nyiŋi ba nɛ.

¹² Korowii ɛɛ ɡeloo ya wobɛlbwa do wer, ásɛ kondikwa kohona ba ya harɛ nɔ ta.

¹³ Toɡra Korowii aa toɡra la ɛɛ tɔ o siee kɛŋɔ nɛn, dɛɛ kwaa ŋwɛnɛ ó kpɔ o ta.