Yela 84 - mzwDBL

Nɛn o bambile aa lawɛ Korowii Dea ka soɡa wa

Kora dea bii yel

¹ Nemenɛ Korowii, n bambile lawɛ he Dea kɛrɛdɛ.

² Bela waa dɛ ɛɛ mɛ taeh! N dɛ nyin kɛ n fe aa lɔ he Dea. Mɛɛ ɡo silɛɛ yela n bambile bwa nee tɛ Korowii waa lole saŋ bɛlbwa la.

³ Joŋa kwara sɔh kɔne, bilore ɡe dɔ a kɔne, a bii yon do a bini, he saraha kon la jwɛh, bela baa fuh kwaa dɛɛ tɛɛ la. Nemenɛ Korowii maa dɛ tomɛ, henee n kooro.

⁴ Nɛra baa lɔ he Dea la, ba na som. Ba ɡo yela dɛɛ kpɛɛre saŋ bɛlbwa.

⁵ Nɛra baa dɛ hwɛɡɛ he nɛɛ la, ba na som. Banɔ la ba bambile aa lawa kɛ ba valɛ kaa Saayɔn Bwejen doa la.

⁶ Ba valɔ kpɔ Baka Fɛlembɔjen bini Korowii ɡel wɛɛ bule o su, kɛŋɔ yoo saŋ bwaala aa nɛa dɛ ɡel o su.

⁷ Ba dɔ bokpeɡa saŋ bɛlbwa dɛɛ la, ka tel kɛ baa na Korowii o kpeɡri aa ɡwaa voɡa bwa, Saayɔn Bwejen doa la.

⁸ Korowii Waa Ɛ Koranar Bwa Kooro, no n wesoŋa, Korowii Jekɔb aa dɛ tomɛ, no n be!

⁹ N Naa Korowii, swee ya kooro waa dɛ tɔ yaa ɡbemɡbe andɛɛɡa, kooro haa leo cheɡ tɛ he te la.

¹⁰ Nɛn soɡe he Dea tɔpebeŋkpoŋ ɡbo aa, a bɔ kɛ waa kaa di tɔpera kaɡboŋ bobɛl. N fe ɛɛ che Korowii maa dɛ tomɛ Dea doonyoa dɛɛ daah bela, dɛ́ ɡwaa kɛ maa kaa so nyubinikpeɡ tena deremi.

¹¹ Korowiirii dɛɛ tɔ yaa ɡbemɡbe, dɛ ɛ ya kooro waa dɔ jirima. O swee yaa andɛɛɡa, dɛ sune ya nɛ, dɛ tɛ yaa jirima. Nɛra ba wa aa toɡra la, waa ban kondɛɛɡe bɛlbwa vɔmɛ.

¹² Nemenɛ Korowii, nomɛlbwa waa kpɔ o te dawɛ he nɛɛ la, o na som.