Yela 83 - mzwDBL

Israel dɔma nɛɛ pɔe wesoŋa

Asaf yel

¹ N Naa Korowii, bɛ nyoa tɔ! Ir nyu ne.

² Na ɡɛ he dɔma aa ir he nɛ, nɛra baa haeh ba deŋne do kpeɡri la.

³ Ba sɔɔh dɛɛ vɔrɔwe he nɛra vɔrɔwa, ba dɛ vɔrɔwe nɛra haa kpɔ nɔn tɔ ba nɛɛ la vɔrɔwa.

⁴ Ba ŋɔ, “Hé ba ya chɔɡ nɛra baa lɔ harɛ la ta, ásɛ Israel harɛ sɔn den nyoɡre kwaraa.”

⁵ Ba nyoa pɛo baa vɔrɔwe he vɔrɔwa. Nɛra baa kpɔ ba te dɛɛ ba ba yoi laanee nɔ,

⁶ Edom ne Ismael tena, ne Moab dɛ Haɡri tena,

⁷ ne Gebal ne Amɔn ne Amalɛk, ne Filisti dɛ Taaya tena.

⁸ Hale Asiiria tena kpɔ ba bokpeɡa ba ja ba nɛ, dɛ́ ba cha Amɔn ne Moab tena baa ɛ Lɔt naanar la.

⁹ Ɛɛ ba ɡɛ haa ɛ Midian tena la, chɔɡ ba ɡɛ haa chɔɡ Sisera ne Jabin, baa ɛ laa nomonome Kesɔn nenabɔɔ ta la.

¹⁰ He kpoo ba bil Ɛndɔr, ba chɔ bela dɛ pɔh.

¹¹ Ɛ ba nomonjena ɡɛ haa ɛ Kooro Oreb ne Kooro Siib la, dɛ́ yo ba koranar bwa, dɛ́ pɔ ba nɛɛ kɛŋɔ haa yo Kooro Seba ne Kooro Salmuna la.

¹² Ba ŋɔ, “Yaa kpɔ Korowii harɛ laanee berɛ ya kon.”

¹³ N Naa Korowii, lɔ ba peɡre kɛŋɔ tutuɡ, kɛŋɔ peu aa taa dɛ kpɔ haahra kaa ken.

¹⁴ Gɛ nii yon fuh kɔr dɛ́ kpɛle bwejena dor bwa la,

¹⁵ kpɔ bwaala peu doŋ ba, dɛ́ ɡel peukpeɡ kpɔ ɔmee kohona ba ta ba nɛ.

¹⁶ N Naa Korowii, ɡel sihiih kpo ba, dɛ́ ɡel ba na he kpeɡri.

¹⁷ Gel ba bwara yɔr, dɛ́ kpɔ ɔmee ta ba nɛɛ saŋ bɛlbwa, ɡel ba sewɛ sihihseo.

¹⁸ Gel ba jemɛ kɛ he ɡbosoo Nemenɛ Korowii, he habɔɔ, kooro bɛlbwa toole harɛ nɔ ta.