Yela 81 - mzwDBL

Tɔpejen bɛl dii yel

Asaf yel

¹ Hé ɡo silɛɛ yela kpɛɛ Korowii waa dɛ tɛ yaa bokpeɡa. Hé ɡo yela kohona kpɛɛ Korowii Israel tena aa dɛ tomɔ.

² Hé pa mun ɡo yela, dɛ́ yiiɡi loŋa, hé kpɔ janjela lɔ yelsoma.

³ Hé hoh pebal nyeɡle bɛla Korobifale Tɔpejen ta, korobie baa kpeɡ ɡe aa, hé berɛ hoh.

⁴ Mmara waa chɔ le dɛ tɛ Israel tena laanee, Korowii Jekɔb aa tomɔ laanee kpɔa tɛ yaa.

⁵ A ɡɛ Mmara nɔɔ Korowii kpɔ tɛ Israel tena, ɡɛ saŋ waa kaa yo Ijipt tena la. N no taa bɛl o ŋɔ,

⁶ “N lɛ he bone haa cheɡa dɛɛ koh, dɛ choɡ he bontɔɡa cheɡ harɛ.

⁷ Gɛ saŋ haa lɔ wenaale ta la, he yerɛ men Korowii, asɛ n ba lɛ heya. N cheɡɛ peukpeɡ bini dɛ chaŋe heya, dɛ daah heyaa na Mɛreba, bela ne aa bula la.

⁸ Israel tena, hé cheɡ deŋne no n wejaala nɔ. N nɛra, n dɛ nyin kɛ he fe aa no n be!

⁹ He bɛ voɡ bɛlbwa tomɛ ka ja n nɛ, he bɛ an dɛɛ ɡuŋi.

¹⁰ Menee Korowii haa dɛ tomɛ, n le he ne Ijipt harɛ ta la. Hé waa dɔ kasinteŋ tɛ mɛ naa, mɛɛ tɛ heya kondikwaa kɛŋɔ, jumbie aa dɛ tɛ o bii la.

¹¹ Kɛ ane abwa, Israel tena aa n be no, baa n waa ta teŋɛ.

¹² Anomanta, n ɡel ba deŋnekpeɡ waa tɛɛ ba, ba kaa ɛ anɔ la aa too ba tea.

¹³ N dɛ nyin kɛ n nɛra fe aa no n deŋna wa, ásɛ dɛɛ teŋɛ n waa ta.

¹⁴ N fe ɛɛ yo ba dɔmaa, dɛ́ pɔ ba nɛɛ warane.

¹⁵ Nɛra baa hah men Korowii ɛɛ kpɔ ɔmee ba ɡuŋi n sie. Ba deŋnetɛra ɛɛ do lee saŋ bɛlbwa dɛɛ la.

¹⁶ Kɛ ane a bwa, mɛɛ tɛ heyaa mendɛɛɡa, ne tohdɛɛɡa he di dɛ vaɡɛ.”