Yela 80 - mzwDBL

Israel harɛ nɛra Korowii aa bera lɛɛ ba wesoŋa

Asaf yel

¹ Israel Peteɡre, no ya wii. Henee tɔ Josef naanar sie kɛŋɔ peteɡre, dɛ so he kookara ta, Kerobim la baah ta.

² Kpɔ he te chaɡle Efrem ne Bɛnjamen dɛ Manasɛ deene tena, che he kpeɡri ta, dɛ́ ba lɛ yaa.

³ N Naa Korowii, berɛ lɛ yaa, sune ya nɛ, ásɛ dɛ lɛ yaa.

⁴ Korowii Waa Ɛ Koranar Bwa Kooro, saŋ besoo he bandia nyoa ɛɛ ba sɔɔhna, he nɛra wesoŋa ta nɔ?

⁵ He ɡelɔ suna do kɛŋɔ kondikwaa yaa di, siniire ɡe do kɛ nee yaa nyɔ.

⁶ He ɡelɔ harɛre nɛra baa bar yaa cheme yo dɔŋa ya harɛ wa, asɛ ya dɔma chɛɡre yaa.

⁷ Korowii Haa Ɛ Koranar Bwa Kooro, berɛ ba lɛ yaa, sune ya nɛ, ásɛ dɛ lɛ yaa.

⁸ He lawɛ yaa le Ijipt harɛ ta, kɛŋɔ haa teŋe ɡrepo da, dɛ ba doŋi harɛ la nɛra le o ta, dɛ kpɔ yaa chɔɔ bela.

⁹ He parɛ daa waa cheɡa tɛ he nɛra Israel tena la mun. O lune kaa bini, dɛ kpeɡ tɔ harɛ la bwa ta, kɛŋɔ he nɛra aa kaa so Keenan harɛ ba mun ya la ken.

¹⁰ Daa la kpeɡo o kpala tɔ bwejena ta, hale pelema bwa ta.

¹¹ Daa la ta kpala ka le Mɛdetereenea Mpo ta, dɛ teŋe ba kaa Yufretis Moo ta.

¹² Ɛrɛɛ he ɡel nɛŋhɔɔhra dɔ bɔr kuuɡi kon baa kpɔa ke daa la nɔɔ? Nomɛlbwa teŋo baa kaa laa, wɛɛ won ba tɔɔ o nɔna di.

¹³ Nɛŋhɔɔhra do kɛŋɔ chweri dɛɛ tiɡri harɛ la ta, kpɔɡ bini ola ɡee chɔɡo.

¹⁴ Korowii Haa Ɛ Kpeɡri Bwa Dɔɔ, berɛ sie ya be. Che nyundua nyiŋi, dɛ́ ba lɛ yan yaa ɛ he nɛra,

¹⁵ haa kpɔ yaa ba so bonɔ, dɛ ɡel ya mun ya kohona nɔ.

¹⁶ Ya dɔma chɔɡ yaa kɛŋɔ baa teŋe da, dɛ kpɔ do nii ta o fuh la ken. Gel he baah di ba nɛ, he chɔɡ ba.

¹⁷ Kpɔ nɔn tɔ nɛra haa lee ba tɛ he te la nɛ, lɛ nɛra haa lee ba dɛ tɛɛ ba kpeɡri kohona la.

¹⁸ Yaa habɔɔ berɛ kpoe kpa, tɛ yaa bokpeɡfala, ásɛ ya won kpɛɛre.

¹⁹ Korowii Waa Ɛ Koranar Bwa Kooro, berɛ ba lɛ yaa, sune ya nɛ, ásɛ dɛ lɛ yaa.