Yela 79 - mzwDBL

Israel harɛ nɛra lɛɛ wesoŋa

Asaf yel

¹ N Naa Korowii, nɛŋhɔɔhra baa wola hen tomɛ, baa lɛ he harɛ la dɔɔh. Ba kpɔ doŋa kah he Dea waa do ɡoroŋ la, dɛ ɡel Jerusalam berɛ dimɡbia.

² Ba kpɔ he nɛra ba wa aa toɡra dɛ serewa la tɛ kɔkɔsakire aa di. Ba berɛ kpɔɡ bini ola kondikwa.

³ Ba kpoo nɛra ba chal fuɡe dɛɛ palɛ kɛŋɔ nee ken, dɛɛ palɛ Jerusalam fɔɡbaahna bwa, nomɛlbwa toole dɛ huɡ ba.

⁴ Harɛre aa bar yaa cheme nɛra dɛ chɛɡre yaa, ba kpɔ yaa berɛ akwekwe nɛra.

⁵ N Naa Korowii, saŋ besoo he baah di ya nɛɛ ka tel ɔ? He bandia ɛɛ teŋɔ ɡwaa ya nɛɛ ɡɛ dɛɛ la naa?

⁶ Gel he baah di harɛre nɛra baa wola hen tomɛ la nɛ, nɛra baa wola hen jemɛ dɛ́ soŋe la,

⁷ dɛkalkɛ ba kpoo he nɛra Israel tena, dɛ chɔɡ he harɛ.

⁸ Bɛ ya naawa wechɔɡa baa ɛa kpɔ tɛr ya deŋne. Na ya sum warane, ya hwɛɡa bwa tonɔ.

⁹ N Naa Korowii, ba cha yaa dɛ́ lɛ yaa. Ba lɛ yaa dɛ́ kpɔ ya wechɔɡa kɛ yaa, he sɔn la wa.

¹⁰ Ɛrɛɛ harɛre nɛra ɛɛ bɔɔ yaa ŋɔ, “Leperaa Korowii haa dɛ tomɔ dɔɔ nɔɔ?” Tɛr nɛra baa kpoo he bonɔɔna deŋne, ya siwi ta bonɔ.

¹¹ No nɛra baa laɡ ba do dea la hima baa dɛ hime. Che he kpeɡri ta, dɛ́ lɛ nɛra baa dɛ ba ba kpoora.

¹² N Naa Korowii, bɔ harɛre baa kaa la kem bele anuanɛ, chɛɡa baa dɛ chɛɡre la wa.

¹³ Ásɛ he nɛra yaa do kɛŋɔ peera he sie nɔ, ɛɛ kpɛɛre saŋ bɛlbwa dɛɛ la, dɛ́ le fini kaa ya naanar baa ka ba bwa nɛ.