Yela 78 - mzwDBL

Korowii ne o nɛra wa

Asaf yel

¹ N nɛra, hé no waa maa dɛ baɡle heya, hé cheɡ deŋne dɛ́ no waa maa dɛ bol.

² Mɛɛ kpɔ sɛɡlaa bol waa chaɡle heya, waa nomɛlbwa aa wola jemɛ bwa, le harɛ nɔ mumpar,

³ waa yaa noa dɛ jema, anɔ la ya naawa aa bola baɡle yaa.

⁴ Yaa kpɔ sɔh ya bii, yaa boloo baɡle ya naanar baa ka ba, dɛ́ kpɛɛ Korowii kpeɡri ne o wejena, dɛ o nyokpo we-ɛɛla waa ɛa.

⁵ O kpɔ o Mmarare tɛ Israel tena baa ɛ Jekɔb naanar, a do le tɛɛ ba. O baɡle ya naawa ŋɔ, bá kpɔ baɡle ba ɡe bii,

⁶ ásɛ ya naanar baa ka ba la hweli le ba be, ba baa kpeɡ aa, bá ɡe bol baɡle ba bii.

⁷ Anee dɛ́ ɡel ba kpɔ ba hwɛɡa dawɛ Korowii nɛ, dɛ bɛ waa waa ɛa la soh, dɛ́ na dɛɛ teŋɛ o Mmarare la ta.

⁸ Baa doe ba kɛŋɔ ba naawa, ba ɛ bambikpeɡ tena ne nɛra baa wola waa bu. Baa ba te kpɔe dɛɛ dawɛ Korowii nɛɛ kɛrɛdɛ, ba waa ta kasinteŋ dɔe tɛo.

⁹ Efrem laa tena kpɔ ba tori, kɛ aa tel laa ta la, ba berɔ chwa kaa dem.

¹⁰ Ba ta Korowii fɔo o ne baa fɔwa la ta teŋɛ, dɛ vɛh o Mmarare la.

¹¹ Ba soh waa waa ɛa, nyokpowaa waa ɛa baɡ ba la.

¹² O ɛ nyokpowaa ba naawa siwi ta, Soan harɛ waa chɔa kaa dɛ do Ijipt harɛ ta.

¹³ O ɡelɔ mpo pere anɛ, dɛ tɔ ba sie, asɛ ba valɛ o bini le kɛŋɔ harɛpɛɛ ken. O ɡelɔ nee la teŋe che kɛŋɔ danjwɛɛ diɡ ne ɡal.

¹⁴ O cheɡɛ bam waa do jaŋne kaa nyundua ta, dɛ tɔ ba sie webaŋa, asɛ jwaana bwa ɡe, o kpɔ nii waa tɛra kaa nyundua tɔ ba sie wɛɛ chaah ba ba won vala.

¹⁵ O pere bwea aa lɔ pua hɛŋle ɡbo harɛ ta nee kohona le a bini, kɛŋɔ mpo nee ken tɛɛ ba.

¹⁶ O ɡelɔ nee le bwe ta, dɛɛ palɛ kɛŋɔ nenapale ken.

¹⁷ Kɛ ba teŋɔ ɛ Korowii wechɔɡa, dɛɛ ɛ Nemenɛ Korowii deŋnekpeɡ, pua hɛŋle ɡbo harɛ la ta.

¹⁸ Ba saahnɔ daah Korowii na, dɛɛ nyin kondikwaa ba pɛla aa lawa.

¹⁹ Ba bol waa yaɡɛ Korowii ŋɔ, “Korowii ɛɛ won tɛ yaa kondikwaa pua hɛŋle ɡbo harɛ ta bonɔ naa?

²⁰ A ɛ kasinteŋ kɛŋɔ o kpɔ kon lɔ bwe, asɛ nee fuɡe le kohona. Aah wɛɛ won tɛ yaa kondikwaa dɛ tɛ yan yaa ɛ o nɛra nɔ ola ja aa?”

²¹ Korowii aa no ba waa la, o baah diu, bandia kohona la ɡelɔ nii ba le o nɛra Israel tena nɛ, asɛ a ɡwaa ba nɛɛ kohona,

²² dɛkalkɛŋɔ ba ta o waa yaradae, ba ta lɛɛ do kɛŋɔ wɛɛ won lɛɛ ba.

²³ Kɛ ane a bwa, Korowii nyoa wobol ɡelɔ nyundua pili.

²⁴ O tɛɛ ba kondikwa ane soo siwi aa le nyundua baa dɛ yera maana ba di.

²⁵ Anomanta, ba di kondikwa nyundua toroma aa dɛ di, o tɛɛ ba ba di dɛ vaɡre.

²⁶ O ɡelɔ wee leebɔr peu ta, dɛ che o kpeɡri ta ɡel weekaŋle harɛbɔr kon ɡe ta,

²⁷ asɛ dɛ ɡel jumbii ba lee o nɛra la bini. A warɔ kɛŋɔ mpo nyoa hɛŋle ken.

²⁸ O ɡelɔ a ba lee bela baa baŋre ba tɛnte deene la dembaah, dɛ bar ba tɛnte deene la bwa.

²⁹ Ba diu dɛ vaɡre, dɛkalkɛ kondikwaa ba pɛla aa lawa laanee Korowii kpɔ tɛɛ ba.

³⁰ Ba taa dɛ di ba pɛla kondikwa a ta su ba nyoo la,

³¹ Korowii baah di ba nɛ, o kpoo ba bini nɛŋkpeɡa, bonɔɔna ba bwara aa kpeɡa kohona Israel harɛ ta la.

³² Kɛ ane a bwa, dɛ ba ta teŋɔ dɛɛ ɛ wechɔɡa, o nyokpo we-ɛɛla la bwa habɔɔ, ba ta on yaradae.

³³ Anomanta, o ɡelɔ ba teŋe sewɛ kɛŋɔ peu aa taa ba kaa ken, dɛ piɡri kpɔ wekpeɡa ba ta ba nɛ.

³⁴ O baa kpoo ba bini bane aa, banɔ la baa kaa la yon berɛ ba o be, dɛ́ charɛ ba liire, dɛɛ soŋo sibeɡra ne.

³⁵ Ba liiro kɛŋɔ Nemenɛ Korowiirii fa do kɛŋɔ Bwetal dɛɛ tɔ ba ɡbemɡbe, dɛ ɛ ba Lɛɛ.

³⁶ Kɛ dɛ neɡra ɡboo baa neɡro, ba wobɛlbwa ta kasinteŋ ɛɛ.

³⁷ Baa o waa ta teŋɛ, baa fɔo o ne baa fɔwa la ta teŋɛ.

³⁸ Kɛ Korowii sune o nɛra nɛ, o kpɔ ba wechɔɡa kɛ ba, o ta ban chɔɡɛ. Keraŋwɛnɛ bwaa o lawɛ bambile, dɛ ɡel o bandia nyoa sɔɔh.

³⁹ O liiro kɛŋɔ ba ɛ nɛwɛnyina baa dɛ ba wona sewɛ, dɛ do kɛŋɔ peu aa taa baa kaa ken.

⁴⁰ Keraŋwɛnɛ bwaa ba ɛ deŋnekpeɡ o nɛ, pua hɛŋle ɡbo harɛ ta, dɛ teŋɛ ɡel o bambile chɔɡ.

⁴¹ Saŋ bɛlbwaa ba na dɛ daah Korowii dɛɛ na, dɛɛ ir Israel Nɛŋɡoroŋ la bwaawee.

⁴² Ba soh o kpeɡri kohona ne tɔpere waa lɛɛ ba le ba dɔma nɔn ta,

⁴³ dɛ ɛ wejena ne nyokpowe-ɛɛla, Soan harɛ waa chɔa kaa, dɛ do Ijipt harɛ ta la wa.

⁴⁴ O ɡelɔ Ijipt harɛ neerare bwa berɛ chal, ba nyin nee dɛ́ nyɔ kahonɛ.

⁴⁵ O ɡelɔ chwɛɛhne fuɡe le ba nɛ, dɛ baa ha ba, asɛ sapone ɡe ba chɔɡ ba harɛ.

⁴⁶ O ɡelɔ tontombɛ ba chɔɡ ba kondikwa, dɛ chɔɡ ba kooni.

⁴⁷ O ɡelɔ dombwea ba chɔɡ ba ɡrepo, ne pur daa kooni bwa.

⁴⁸ O kpoo ba nae dombwea ne, dɛ ɡel bwaala kɔr kpoo ba peera.

⁴⁹ O kpɔ o bandia kohona ba ta ba nɛ, dɛ ɡel ba waa do sum kohona, a do kɛŋɔ baa tomɛ toroma ŋɔ, bá ba kpoo ba ken.

⁵⁰ O ta ɡelɛ o bandia nyoa sɔɔh, kɛɛ dɛ́ kpɔ ba bwara kɛ ba, o kpoo ba weechɔɡa ne.

⁵¹ O kpoo Ijipt harɛ bibanloɡla, dem bɛlbwa ta.

⁵² Asɛ dɛ tɔ o nɛra sie kɛŋɔ peteɡre ken, dɛ kpɔ ba valɛ pua hɛŋle ɡbo harɛ ta.

⁵³ O tɔ ba sie dɛ nyiŋi ba nɛɛ kɛrɛdɛ ba ta ɔmɛ, kɛ ba dɔma la te, mpo bɔle ba nɛ, dɛ kpɔ ba kaa.

⁵⁴ O kpɔ ba ba o harɛ waa do ɡoroŋ ta, deŋɡarere harɛ nɛra aa soɡe a ta, o yo dɛ lɛa la.

⁵⁵ O tɔ sie doŋi nɛra baa soɡe harɛ la ta, dɛ bɔne harɛ la denaa ta tɛ Israel tena, dɛ kpɔ ba ka so ba deene la ta.

⁵⁶ Kɛ ba ɛ Nemenɛ Korowii deŋnekpeɡ, dɛ daahno na, ba vɛh o Mmarare ta teŋa.

⁵⁷ Ba deŋne kpeɡri, baa waa bu kɛ ba naawa ken, ba waa ta kasinteŋ dɔe.

⁵⁸ Ba kpɔ bela baa dɛ tomɛ ba voɡa dɛɛ muɡli o baah, dɛ kpɔ ba voɡa dɛɛ ir o bwaawee.

⁵⁹ Korowii aa no ba waa la, o baah diu kɛrɛdɛ, anomanta, o vɛh Israel tena kwaraa.

⁶⁰ O ɡel o Tɛnte Dea waa lɔ Silo, waa ɡela ba baŋro o ɛ o dobɔr harɛ nɔ ta la.

⁶¹ O ɡelɔ ya dɔma ba kpɔ Korowii Ne Nɛwɛnyina Fɔo Daka la. Onee cheɡa tɛ o kpeɡri ne o jirima.

⁶² O baah di o ɡbaɡba nɛra nɛ, dɛ ɡel ba dɔma kpoo ba.

⁶³ O ɡelɔ ba kpoo ba bonɔɔna laa ta, ba toli ta baala dɔe dɛ yalɛ.

⁶⁴ Ba kpoo ba sɔfore laa ta, ba ta ɡelɛ ba luhaahna wi.

⁶⁵ Belaa Korowii ir, a do kɛ nɛn waa ir dom ta ken, kɛŋɔ nɛn o bwara aa kpeɡa, dɛ nyɔ sen a dɛɛro, o bwara yon ir la.

⁶⁶ O ɡelɔ o dɔma peɡre, ba di sihiih saŋ bɛlbwa dɛɛ la.

⁶⁷ O vɛh Josef naanar, o ta Efrem dea nɛra leɛ.

⁶⁸ Kɛ Juda dea nɛraa o le, ne Saayɔn Bwejen waa dɛ nyin bela kohona la.

⁶⁹ Belaa o ma o Dea, o do jaŋne kɛ bwejena ken. O mao o che kɛ harɛ waa tao nɔ, dɛ che kiŋkiŋ saŋ bɛlbwa dɛɛ la.

⁷⁰ O le o bonɔɔ Devid ɡɛ saŋ waa dɛ nyiŋi peera nɛɛ kpɔɡ bini,

⁷¹ dɛ ba o ne ŋɔ, ó ba tɔ o nɛra Israel tena baa ɛ o kapɛrɛ nɛra la sie, kɛŋɔ peteɡre.

⁷² Devid nyiŋi ba nɛɛ bambile bwa ne, dɛ tɔ ba sie wejema ne.