Yela 77 - mzwDBL

Bolarawa dɔe suna dii ta

Asaf yel

¹ N wio no Korowii ŋɔ, ó cha mɛ, n wio noo asɛ o no n be.

² Gɛ saŋ wa aa puu mɛ la, n wio no Korowii, n ɡɔɔ nɔɔra jwaana bwa dɛ soŋo, kɛ n ta bolarawa bɛlbwa dɔe.

³ N Naa Korowii, n lii he wa aa, n bambile chɔɡɔ mɛɛ hime. N lii he wa aa, n bwara dɛ yɔr.

⁴ He ɡelɔ maa won dom chɔ, n bwara dɛ nyɛɡ n bol waa kahonɛ.

⁵ N lii tɔpera, ne bene aa baa kaa saŋ la wa.

⁶ N chɔɔ jwaana bɛlbwa naa, n liire ɡwaa n nɛ. N liira ɡɛ naa, waa maa dɛ bɔɔ n te laanee kɛŋɔ,

⁷ “Korowii ɛɛ den vɛh yaa kwaraa ɡɛ naa? Waa ya nɛɛ sune kpa aa?

⁸ O nyina aa wola jaɡa dɔe la toole ya nɛɛ kpa aa? Nyoa waa baɡɛ yaa la toole kpa aa?

⁹ Korowii soɔh kɛŋɔ ó sune ya nɛ aa? Bandia baa chiɡ tedoma waa dɔa tɛ nɛra la naa ta kɛɛ?”

¹⁰ Asɛ n ŋɔ, “Waa aa dɛ ha mɛ kohona laanee kɛ, Nemenɛ Korowii ta kpeɡri dɔe dɛ́ won lɛ yaa kpa kɛɛ?”

¹¹ N Naa Korowii, mɛɛ lii he wejena haa ɛa la waa, he nyokpowaa haa ɛa saŋ la.

¹² Mɛɛ lii waa haa ɛa laanee, ásɛ dɛ lii he wejena haa ɛa la bwa.

¹³ N Naa Korowii, he wobɛlbwa do ɡoroŋ, voɡa nɛra aa dɛ tomɛ la ta kpeɡri dɔe kɛŋɔ, hen Korowii yaa dɛ tomɛ nɔ.

¹⁴ Henee Korowii haa dɛ ɛ nyokpowa, he baɡle he kpeɡri harɛre nɛra bwa bini.

¹⁵ He cheɡɛ he kpeɡri ta dɛ lɛ he nɛra, Jekɔb ne Josef naanar bwa.

¹⁶ N Naa Korowii, neerare do kɛŋɔ nɛra, dɛ nae dɛɛ ɔmɛ, asɛ mpo vile ɡe ɛɛ chel he sie.

¹⁷ Baama nɛ bwaala, dɛ nyɛɡle le nyundua, asɛ dɛ kɔɡre dɛɛ nyɛɡle bobɛlbwa kɛŋɔ, haa ta he hɛma la ken.

¹⁸ He ɡelɔ bwaala nyɛɡle dɛɛ kɔɡre kohona, dɛɛ nyɛɡle harɛ nɔ ta bwa, asɛ harɛ jiɡri.

¹⁹ He valɛ mpo nehɛma ta dɛ ɡale o vile, kɛ ba ta he nabuɡe nae.

²⁰ He tɔ he nɛra sie kɛŋɔ peteɡre ken, asɛ Mosis ne Arɔn chɔ ba nyoa.