Yela 76 - mzwDBL

Korowii pɔ o dɔma nɛ

Asaf yel

¹ Nɛra baa lɔ Juda harɛ ta jemɛ Korowii, hale Israel harɛ ta tena dɛ́ bol ŋɔ Korowii sɔn kan.

² Jerusalamee o bwɛ, o so Saayɔn Bwejen doa.

³ Belaa o kuuɡi o dɔma hɛma, ne kwaa baa kpɔa dɛɛ tɔ ɡbemɡbe ne keri, dɛ dɔmkwaa bwa soo siwi.

⁴ N Naa Korowii, he jirima kan, he kpɔ le bwejena haa yo he dɔma, dɛ pɔ ba nɛɛ a ta la dor.

⁵ Ba lɛ dɔmkwaa bwa aa lɔ ba banyoola be, asɛ ba serewe chɔ. Ba kpeɡri ne ba wejema bwa ɛ wepuu.

⁶ Korowii Jekɔb aa dɛ tomɛ, haa aah ba la, ba jaɡre ne nɛra baa soɡe a ta bwa serewɔ.

⁷ N Naa Korowii, he ɡbosoo nɛra bwa ɛɛ ɔmɛ, he baah diu waa, nomɛlbwa aa won che he sie.

⁸ Nyundua he che bol nɛra waa dɛɛ pa bole, asɛ harɛ nɔ ta nɛra ɔmɛ dɛ hel jeih ken,

⁹ ɡɛ saŋ haa ira che dɛ́ pa nɛra bole dɛ́ lɛ nɛra baa dɛ fiɡ ba harɛ nɔ ta la.

¹⁰ Kasinteŋ, he baah di nɛra nɛ aa, a ɡelɔ baa kpɛɛre. Banɔ la baa le he bandia nyoa la, ba dɛ nyiŋi ba te kɛrɛdɛ.

¹¹ Hé kpɔ kwaa haa baɡɛ Korowii haa dɛ tomɔ nyoa la ba tɛo. Harɛre nɛra haa bɛna bwa, hé kpɔ koŋkɛɛla ba tɛo, onee chɛ kɛ nɛra bwa ɛɛ ɔmɛ.

¹² O dɛ sɔɔh koranar bambikpeɡ nyoa, koranar baa lɔ harɛ nɔ ta bwa dɛ ɔmɔ.