Yela 75 - mzwDBL

Korowii waa dɛ pa bole

Asaf yel

¹ N Naa Korowii, ya kpɔ jam dɛɛ tɛɛ, ya dɛ bol kan haa doa, ne nyokpowaa haa ɛa wa.

² Korowii ŋɔ, “N le saŋ bɛl cheɡ dɛ́ bol nɛra wa, dɛ́ pa bole aŋwɛnɛ ta.

³ Dɛ harɛ jiɡro Korowii kontaala bwa ɛɛ chel aa, mɛɛ ɡeloo kwaa aa lawɔ kpoŋe la che kiŋkiŋ.

⁴ N dɛ ŋɔ mbarafo tena be ŋɔ, ‘Hé ɡel mbarafo ɛɛ’, dɛ ŋɔ nyubinikpeɡ tena ɡe be ŋɔ, ‘Hé ɡel mbarafo wobol bola.

⁵ He bɛ waa bol yaɡɛ men Korowii.’ ”

⁶ Nɛra waa bola dɛ́ pa bole toole wee leebɔr kɛɛ wee cholibɔr, weekaŋle harɛbɔr kɛɛ weekaŋle nyundua.

⁷ Korowiirii bol nɛra waa dɛɛ pa bole. Onee dɛɛ pa boldɛɛɡe, dɛɛ pa bolchɔɡe ɡe.

⁸ Korowii kpoŋe numol, o bandia aa do kɛŋɔ danana nee suu. O fuɡa kɛŋɔ seŋkpeɡa tɛ nyubinikpeɡ tena bwa ba nyɔ, ba nyɔ a bwa a tonɛ kwaraa.

⁹ Kɛ n te, maa Korowii Israel tena aa dɛ tomɔ waa bolaa ɡel saŋ bɛlbwa bwa, mɛɛ ɡo kpɛɛra yelaa tɛo.

¹⁰ Wɛɛ sɔɔh kpeɡri nɛnchɔɡa aa dɛ di la nyoaa, kɛ nɛra ba wa aa toɡra te, wɛɛ berɔ tɛɛ ba bokpeɡa.