Yela 74 - mzwDBL

Israel harɛ nɛra lɛɛ wesoŋa

Asaf yel

¹ N Naa Korowii, ɛrɛɛ he den vɛh yaa kwaraa ɡɛ nɔɔ? Saŋ besoo hɛɛ nyin he baah di he ɡbabir nɛra nɛɛ ka tel ɔ?

² Lii he nɛra saŋ la haa lee ba cheɡ tɛ he te la wa, nɛra haa lɛɛ ba le fiiɡa baa dɛ fiɡ ba ta. Lii Saayɔn Bwejen he fa aa soɡe o ta la wa.

³ Ba dɛ́ ba na he Dea ya dɔma aa kuuɡu, o chɔɡ dɛ berɛ dimɡbia la.

⁴ He dɔma moolo dɛɛ hɛɡre he Dea la bini, ba kpɔ ba fraŋkaare pa, a baɡle kɛŋɔ ba pɔ ya nɛ.

⁵ Ba do kɛŋɔ nɛra baa kpɔ kpanfɛre dɛɛ teŋni daa ken.

⁶ Ba kpɔ ba kpanfɛre ne ba saahne chɔɡ kwaa baa kpɔ daa sɛah la bwa.

⁷ Ba fuh he Dea la, dɛ kpɔ doŋa kah bela baa dɛ tomɛ la.

⁸ Ba bol dɔŋa be ŋɔ, “Yaa chɔɡ baa kwaraa!” Ba fuh dea bɛlbwa baa dɛ tomɛ hen Korowii o ta harɛ la ta.

⁹ Korowii keamere toole kpa, ásɛ ya na he nyokpowe-ɛɛla. Nomɛlbwa ɡe aa jemɛ saŋ ya wenaale aa ba a jaɡa.

¹⁰ N Naa Korowii, saŋ besoo ya dɔma mamɛ ka tel ɔ? Bá na dɛ́ bol waa dɛɛ yaɡɛ he sɔn saŋ bɛlbwa ɡɛ kɛɛ?

¹¹ Ɛrɛɛ he laa sie kpɔ ya nɛ haa wola yaa ba cha nɔɔ? Ɛrɛɛ he fɔɔ nɔɔra haa wola ba deŋnee ba tɛr nɔɔ?

¹² N Naa Korowii, henee Kooro le saŋ la bwa, henee bala dɛ́ ba lɛ harɛ nɔ ta nɛra.

¹³ He cheɡɛ he kpeɡri kohona ta, dɛ ɡel mpo pere, dɛ paɡre mpo bini oljena nyuune.

¹⁴ Henee paɡre mpo bini oljen baa dɛ yerɔ Lɛvayatan la nyuune, dɛ kpɔ tɛ pua hɛŋle ɡbo harɛ ta olchɔɡa a di.

¹⁵ He ɡelɔ buli ne nenabɔɔne ɛɛ palɛ, dɛ ɡel mojena hweeh.

¹⁶ Henee ta bɔchaah ne biro, dɛ kpɔ wee ne korobie cheɡ a chebɔra,

¹⁷ henee bil harɛ jwɛhre, dɛ ta bwaala ne lɔmɔɡa saŋ.

¹⁸ N Naa Korowii, na ɡɛ he dɔma aa dɛ mamɛ, na ɡɛ nɛra baa wola hen tomɛ aa dɛ ɛɛ nɛnhɛla.

¹⁹ Bɛ he nɛra baa ɛ nɛŋɡwɛɡra, ɡel tɛ ba dɔma ba nyu bini aa kpeɡa kohona nɔ. Bɛ he nɛra baa dɛ ɛɛ ba hɔhɔrɔwa la waa soh.

²⁰ Lii fɔo ya ne haa fɔwa la wa. Nɛra sɔɔh dɛɛ ɛ naɡrenyin we-ɛɛla biro bini, harɛ nɔ ta bwa.

²¹ Bɛ ɡel sihiih kpo nɛra baa dɛ fiɡ ba la, ɡel nyaara ne nɛŋɡwɛɡra kpɛɛ he sɔn.

²² N Naa Korowii, ir nyu ne, dɛ́ nyiŋi he waa ta, dɛ́ dɔ waane bol, bɛ soh kɛŋɔ ɡɛna dɛ mamɛ saŋ bɛlbwa.

²³ Bɛ ɡbɔɡa he dɔma aa doa dɛɛ muɡli he baah la soh, ɡbɔɡa he dɔma aa teŋa dɛɛ do la.