Yela 73 - mzwDBL

Yela tɔn toorote (Yela 73—89) Korowii kasinteŋ waa dɔa

Asaf yel

¹ Kasinteŋ, Korowii waa wer tɛ o nɛra Israel tena, banɔ la ba tea bini aa toa dɛɛ teŋɛ o waa ta la.

² Kɛ n te, a ka tama n liire fe chɔɡ, n yarada ɡe fee tonɛ,

³ dɛkalkɛ n na ɡɛ nyubinikpeɡ tena, ne mbarafo tena wa aa wera dɛɛ tɛɛ ba la aa, dɛ n dɛ wee ba bwara.

⁴ Baa bonyɛɡa bɛlbwa na, ba bwara kpeɡri kɛrɛdɛ.

⁵ Baa wenaale aa dawɛ nɛwɛnyina nɛɛ la na. Baa weechɔɡa aa dɛ ba nɛra nɛɛ la we.

⁶ Anomanta, ba kpɔ mbarafo do baŋa kɛŋɔ baŋa kwa, asɛ naɡrenyin ber ba yal ba kpɔ tɔ.

⁷ Wechɔɡa su ba bambili, nyubinikpeɡ vɔrɔwa ɡbo waa swɛɛ ba siwi baa lii.

⁸ Ba dɛ mamɛ ba bala, dɛɛ bol ba bwara wechɔɡa, ba dɔ mbarafo, dɛɛ vɔrɔwe ɡɛ baa fiiɡi ba bala.

⁹ Ba bol waa dɛɛ yaɡɛ Korowii waa lɔ nyundua, dɛ che mbarafo ta dɛɛ do nɛra baa lɔ harɛ nɔ ta wechɔɡa ta.

¹⁰ Anomanta, Korowii nɛra berɔ baa teŋɛ ba nɛ, dɛɛ yarada waa baa dɛ ɛ la bambile bwa ne kɛrɛdɛ.

¹¹ Ba ŋɔ, “Ɛrɛɛ Korowii ɛɛ ba wona jemɛ ɔ? Nemenɛ Korowii ta a wejema dɔe.”

¹² Gɛɛ nyubinikpeɡ tena waa do, wobɛlbwa aa ban ha, ba dɔ kondɔɔh saŋ bɛlbwa dɛɛ ja.

¹³ Amɔ pɛɛpɛɛ n ɡel n bambile bini to, n ta wechɔɡa bɛlbwa ɛɛ nɔ naa?

¹⁴ N Naa Korowii, he ɡelɔ n bwara nyɛɡ mɛ tɔpebir bwa, chɔɔ bɛlbwaa hɛɛ tɛr n deŋne.

¹⁵ Dɛ n bol ɡɛ waa la bɛlbwa naa, n fe le he nɛra la tɛ.

¹⁶ N fe takapɔ kɛŋɔ n no ɡɛ waa nɔ mun, kɛ a kpeɡri tɛ mɛ kɛrɛdɛ,

¹⁷ nemenɛ maa jo hen Korowii Dea mɔɔ, dɛ jemɛ waa aa pu nyubinikpeɡ tena la.

¹⁸ Kasinteŋ, hɛɛ ɡeloo ba lɔ na, dɛ́ choɡli baa wola won ir kpa.

¹⁹ Ba chɔɡɔ buɡ la ta, dɛ sewɛ seo wɔb.

²⁰ Ba do kɛŋɔ nɛn yon chɔ dɛ́ dee, tɔɔ ne pera dɛ o soɔh la ken. N Naa Korowii, he ɡɔɔ he te naa, ba bwa dɛ́ peɡre.

²¹ N bambile aa chɔɡa, n loo ku la,

²² dɛ n ɡɛnɔ kɛŋɔ ol ken, n ta he waa mun noɛ.

²³ Kɛ dɛ saŋ bɛlbwa n ja he nɛ, he lawɛ n nɔn kpoŋe.

²⁴ He dɛ baɡ mɛ asɛ mɛɛ teŋɛ he waa la ta. A habɔɔ la, hɛɛ lɛɛ mɛɛ ń dɔ jirima.

²⁵ N Naa Korowii, he ɡboo lɔ nyundua dɛ́ won cha mɛ. He habɔɔ, maa komɛlbwa nyin harɛ nɔ ta.

²⁶ N bwadabii ɡwɛɡrɔ n liire chɔɡ aa, hen Korowiirii dɛ́ tɛ mɛ bokpeɡa, henee n komɛlbwa.

²⁷ Nɛra baa berɛ habɔɔ kpoe la bwa ɛɛ serewoo, ɡɛɛ nɛra baa wola he waa ta teŋɛ la, hɛɛ ba ɡela ba ɡe serewe.

²⁸ Kɛ n te, a wer kɛŋɔ ń bɛne hen Korowii. Hen Nemenɛ Korowiirii n chwa baa marɛ, hɛɛ lɛɛ mɛ, mɛɛ bol he nyokpowaa haa ɛa bwaa baɡle nɛra.