Yela 72 - mzwDBL

Korowii soŋa dɛ́ tɛ kooro

¹ N Naa Korowii, baɡle kooro ɡɛ waa bol wa, dɛɛ pa bole aŋwɛnɛ ta, ɡɛ he wa aa toɡra. Baɡlo o do ɡɛ haa doa la,

² ásɛ dɛ bol he nɛra waa dɛɛ pa bole aŋwɛnɛ ta, dɛ́ nyiŋi he nɛra baa dɛ fiɡ ba la nɛɛ kasinteŋ ne.

³ Gel kondikwaa ba ya harɛ ta kohona, toɡra he nɛra wa aa toɡra la wa.

⁴ Gel kooro bol nyaara waa dɛɛ tɛɛ ba aŋwɛnɛ ta, dɛɛ cha ba bii, dɛ́ pɔ nɛra baa dɛ fiɡ ba la nɛ.

⁵ Gɛ wee ne korobie aa dɛ chaah saŋ bɛlbwa nɔ, ɡɛɛ he naanar baa ka ba ɡe, ɛɛ ba he toma saŋ bɛlbwa dɛɛ la.

⁶ Gel kooro do kɛŋɔ bwaala waa ɡela koo kwa ɛɛ do wer, dɛ́ do kɛŋɔ bwaala nee aa ɡela harɛ sɔɔh, dɛɛ do wer la ken.

⁷ N Naa Korowii, ɡel waa aa wera dɛ toɡre la do harɛ nɔ ta, o kora dii ta saŋ bɛlbwa, ásɛ nɛra baa soɡe harɛ nɔ ta dɔ deŋnesɔɔhna ka tel kɛŋɔ, korobie aa ɡel chaahna.

⁸ Wɛɛ di koraa le mpo bɛl ta ba kaa bɛl ta, dɛ le Yufretis Moo ta ba kaa harɛ jaɡa.

⁹ Nɛra baa lɔ pua hɛŋle ɡbo harɛ ta ɛɛ ba ɡuŋi o siee, ásɛ o dɔma chole chɔ bomboɡ ta.

¹⁰ Taases harɛ koranar, ne nɛra baa soɡe mpo nyoa bojaŋa ɛɛ kpɔ ba harɛre kwaa ba tɛo. Seeba ne Seba koranar ɡee kpɔ koŋkɛɛlaa ba tɛo.

¹¹ Koranar bwa ɛɛ ba ɡuŋuu, ásɛ harɛre nɛra bwa tomɔ.

¹² Kooro la ɛɛ lɛ nyaara baa wia dɛɛ noo, ne nɛŋɡwɛɡra baa wola nɛra dɔe bá cha ba laanee.

¹³ Wɛɛ na nyaara ne nɛŋɡwɛɡra sumii, dɛ́ lɛɛ ba le seo nyoa.

¹⁴ Wɛɛ lɛɛ ba le fiiɡa ne nɛnchɔɡa nɔn taa, dɛkalkɛŋɔ ba mkpa dɔe waa hiaoh.

¹⁵ N Naa Korowii tɛ kooro mkpajaŋ! Gel nɛra le Seeba harɛ ta dɛ́ kpɔ suuɡaswɛm ba tɛo. Gel nɛra sweero andɛɛɡa saŋ bɛlbwa, dɛ́ soŋe dɛɛ tɛo tɔpere bɛlbwa ɡe.

¹⁶ Gel boyu perɛ harɛ nɔ ta, ásɛ mea ɡe bu deŋɡarere bwa dor. Gel a ɛ kɛrɛdɛ kɛŋɔ anɔ la aa lɔ Lɛbanɔn harɛ bwejena dor, ásɛ nɛra ɡe su bwɛjena la ta, kɛŋɔ kpɔɡa aa lɔ koo ta ken.

¹⁷ Gel kooro sɔn do le saŋ bɛlbwa dɛɛ la kɛŋɔ, wee aa lole dɛɛ lɔ saŋ bɛlbwa nɔ. Harɛre nɛra bwa ɛɛ che o nɛɛ dɔ andɛɛɡa ásɛ dɛ na kɛŋɔ Korowii sweero andɛɛɡa.

¹⁸ Hé kpɛɛ Korowii Israel tena aa dɛ tomɔ! O ɡboo dɛɛ ɛ nyokpowe-ɛɛla.

¹⁹ Hé kpɛɛ o sɔn waa dɔ jirima saŋ bɛlbwa dɛɛ la. Hé ɡel o jirima su harɛ nɔ ta bwa. Aamen.

²⁰ Jese bibaa Kooro Devid wesoŋa la jaɡaa nɔ.