Yela 71 - mzwDBL

Banjena bɛl wesoŋa

¹ N Naa Korowii, henee n chwa baa marɛ, bɛ ɡel sihiih kpo mɛ.

² Che toɡra he wa aa toɡra ta, dɛ́ cheɡ deŋne no n be, dɛ́ lɛɛ mɛ.

³ He do kɛŋɔ Bwetal maa chwaa baa marɛ saŋ bɛlbwa, che he waa haa bola la ta, dɛ́ lɛɛ mɛ. Henee n Bwetal, ne n danjwɛkpeɡ.

⁴ N Naa Korowii maa dɛ tomɛ, lɛɛ mɛ le nyubinikpeɡ tena, ne wechɔɡ-ɛɛra nɔn ta.

⁵ Dɛkalkɛ Nemenɛ Korowii, he nɛɛ mɛɛ hwɛɡɛ, n kpɔ n te dawɛ he nɛ, dɛ le n bechale saŋ bwa.

⁶ N soɡa bini bwaa n le, dɛ kpɔ n te dawɛ he nɛ, baa lol mɛ bwaa he le, dɛ kpɔ nɔn tɔ n nɛ. Mɛɛ kpɛɛree saŋ bɛlbwa.

⁷ Nɛra ɡalɡa hweli n we-ɛɛla, dɛ kpɔ dɛɛ ɛ wa, dɛkalkɛ henee cheɡɛ n habɔɔ.

⁸ Tɔpebir bwaa mɛɛ kpɛɛre, dɛɛ baɡle ɡɛ he jirima aa doa.

⁹ Bɛ men ta n hwɛɛhra bini, bɛ men vɛh n ɡwɛɡra saŋ.

¹⁰ N dɔma dɛ nyin mɛ dɛ́ kpo, ba dɛ vɔrɔwe n vɔrɔwa.

¹¹ Ba dɛ bol ŋɔ, “Korowii vɛoh, hé ɡel ya tiu dɛ́ lawɔ, nomɛlbwa toole dɛ́ lɛo.”

¹² N Naa Korowii, bɛ ɡel n ne he baah do jaŋne, ba warane dɛ́ ba cha mɛ.

¹³ Gel sihiih kpo nɛra baa cheɡɛ n nɛ, nɛra baa dɛ nyin n ne wechɔɡa la, ɡel ba di ncho kohona.

¹⁴ Kɛ n te, mɛɛ kpɔ n hwɛɡaa do he nɛɛ saŋ bɛlbwa, maa he kpɛɛraa ɡel bwa.

¹⁵ Mɛɛ bol he wedɛɛɡa ɛɛ waa, dɛ́ bol lɛɛ haa dɛ lɛ nɛra tɔpebir bwa wa, a lole kɛ a ɡwaa n liire ta kɛ ń won jemɛ.

¹⁶ Nemenɛ Korowii, mɛɛ bol he wejena haa ɛa waa, mɛɛ bol toɡra he wa aa toɡra waa, he ɡbosoo waa toɡra.

¹⁷ N bechale saŋ bwaa he le baɡ mɛ he nyokpowe-ɛɛla wa, n ta ɛɛ bola dɛ ba le fini.

¹⁸ Hale n hwɛɛhrɔ n nyumpona to kwaraa naa, N Naa Korowii, bɛ men ta. Ja n nɛ, ásɛ n bol he kpeɡri ne he kan haa doa waa baɡle n naanar baa ka ba bwa.

¹⁹ N Naa Korowii, toɡra he wa aa toɡra kan kohona, he we-ɛɛla ɡe kan kohona. He habɔɔ, nomɛlbwa toole.

²⁰ A lole kɛŋɔ he ɡelɔ n na wahala kohona te, kɛ hɛɛ berɔ ɡel n dɔ bokpeɡa ja, hɛɛ laɡ mɛɛ le seo nyoa, dɛ́ tɛ mɛ mkpa.

²¹ Hɛɛ ɡeloo ń ɛ nɛnjen kohona, dɛ́ berɛ kwaa larawe n bwara ja.

²² Mɛɛ lɔ janjelaa kpɛɛre, N Naa Korowii maa dɛ tomɛ, mɛɛ kpɛɛree he kasinteŋ haa dɔa la wa. Mɛɛ kpɔ n janjelaa lɔ yela kpɛɛ hen Israel Nɛŋɡoroŋ la.

²³ Mɛɛ do lɔŋɔre silɛɛ nee, mɛɛ ɡo yelaa kpɛɛre, he lɛɛ haa lɛɛ mɛ la wa.

²⁴ Mɛɛ bol he toɡra haa toɡra waa tɔpebir bwaa, dɛkalkɛ nɛra ba fe aa dɛ nyin n ne wechɔɡa la, sihiih kpo ba, ba wili.