Yela 7 - mzwDBL

Waa soŋa aŋwɛnɛ ta

Kooro Devid yel

¹ N Naa Korowii, n chwao baa marɛ. Lɛɛ mɛ dɛ́ kpɔ nɔn tɔ n nɛ, dɛ́ le nɛra baa cheɡɛ n nɛɛ nɔn ta,

² ásɛ ba bɛ n bini peeɡe kɛŋɔ nyujente, dɛ́ toɡri n bini nomɛlbwa aa wola won lɛɛ mɛ.

³ N Naa Korowii, dɛ n ɛ nomɛlbwa wechɔɡa, dɛ di a bolchɔɡe,

⁴ dɛ n ɛ nɛn n ne waa soma wechɔɡa, kɛɛ dɛ ɛ nɛn waa cheɡɛ n nɛɛ wechɔɡa pɛɛpɛɛ aa,

⁵ ate, tɛ n dɔm ŋwɛnɛ ó dɔɔ mɛ lawɛ, dɛ́ kpo mɛ bil, ásɛ n sewɛ chɔ.

⁶ N Naa Korowii, ɡel he baah di. Kpɔ ba che n dɔma ba baah aa di n nɛɛ kohona la nɛ. Ir nyu ne tɛ mɛ, dɛ́ pa bole.

⁷ Gel harɛre nɛra bare cheme he do nyundua dɛ́ di kora ba nɛ.

⁸ Henee bol nɛwɛnyina bwa waa dɛɛ pa bole. Nemenɛ Korowii, cha mɛ, dɛ́ bol n waa tɛ mɛ. He jemɔ kɛŋɔ n tea too.

⁹ N Naa Korowii, he waa toɡrɔ, he jemɛ nɛwɛnyini bambile bini, ne o liire bwa wa. Gel nyubinikpeɡ tena naɡrenyin waa bwa ba a jaɡa, dɛ́ ɡel nɛra ba wa aa toɡra do le.

¹⁰ Nemenɛ Korowiirii dɛɛ tɔ mɛ ɡbemɡbe, on dɛɛ lɛ nɛra baa dɛ teŋɛ o waa ta.

¹¹ Korowii dɛ bol waa aŋwɛnɛ ta kasinteŋ ne, dɛɛ pa wechɔɡ-ɛɛra bolchɔɡe saŋ bɛlbwa.

¹² Dɛ wechɔɡ-ɛɛra la ta ba liire charaa, Korowii ɛɛ sar o tokobii, dɛ́ harɛ o to kpa.

¹³ Korowii ɛ o dɔmkwaa anchɔɡa cheɡ, o hɛma ɡe nyoo ɛɛ lawɛ nii, dɛɛ kpa ɡɛ nɛra.

¹⁴ Na ɡɛ wechɔɡ-ɛɛra aa dɛ vɔrɔwe wechɔɡa! Ba dɛ le jina dɛɛ neɡre nɛra.

¹⁵ Ba nafuɡere baa kwia la, ba ɡbaɡbaa dɛ́ le a ta, á laɡ ba.

¹⁶ Naɡrenyin waa baa liira la ɡure ba nɛ, waa baa ba a ne la, ba ɡbaɡbaa dɛ́ na a wa.

¹⁷ N dɛ jam N Naa Korowii, dɛkalkɛ o waa toɡrɔ. Mɛɛ ɡo yelaa kpɛɛ Nemenɛ Korowii.