Yela 69 - mzwDBL

Chae wesoŋa

Kooro Devid yel

¹ N Naa Korowii, lɛɛ mɛ, n wenaale do kɛŋɔ nee aa sua dɛ ba maɡɛ n baŋa ta.

² A do kɛŋɔ maa dɛ morɛ vil kpechɛɡre aa lɔ o bini, n ta bodɛɛɡe dɔe ń kpɔ n naa cheɡ. A do kɛŋɔ maa le vil bini nehɛma ɛɛ ba lɔe ba tɔ n nɛ.

³ N wio noe ŋɔ hé ba cha mɛ, dɛ ba koh, n lobi bwa holɔ. N nyiŋi he siwi ta, he ba cha mɛ kahonɛ.

⁴ Nɛra baa hah mɛ pɛɛ warɔ ɡwaa n nyumpona. N dɔma teŋe nyosone dɛɛ dawɛ n nɛ, ba bwara kpeɡri baa nyin mɛ dɛ́ kpo, ba ɡelɔ n berɛ bɔ kwaa maa wola ŋwɛɛ kem tɛɛ ba.

⁵ N Naa Korowii, n wechɔɡa bwa chɔ he sie, he jemɛ n ɡɛnewaa bwa.

⁶ Nemenɛ Korowii, bɛ ɡel nɛra baa kpɔ ba te dawɛ he nɛɛ la di sihiih n wa. Bɛ ɡel a che n nɛɛ sihiih kpo nɛra baa dɛ tomɛ. Henee Korowii Israel tena aa dɛ tomɛ.

⁷ He waa ba koh dɛɛ chɛɡ mɛ, asɛ sihiih kpo mɛ.

⁸ N berɛ hɔɔh n lolanar be, dɛ do kɛ nomɛl waa le harɛfale bɛl ta, n ɡbaɡba nɛra bini.

⁹ He Dea la waa swɛɛ n siwi taeh, chɛɡa baa dɛ chɛɡre bwa ɡe dawɛ n nɛ.

¹⁰ N vɔwɛ nyoa dɛɛ di suna, asɛ nɛra ɛɛ chɛɡ mɛ.

¹¹ N tɔ lweyal asɛ baa mam mɛ.

¹² Ba dɛ bol n waa fɔɡbaahna, sennyɔdɛɛra kpɔ mɛ dɛɛ ɡo yela.

¹³ Kɛ N Naa Korowii, henee n wi dɛɛ no, le saŋ haa dɛ nyin cheɡ dɛ́ chaŋ mɛ. Chaŋ mɛ he nyina waa kana la wa, he nyoa haa baɡ mɛ nomanta, hɛɛ lɛɛ mɛɛ.

¹⁴ Lɛɛ mɛ le n wenaale aa do kɛ maa dɛ morɛ vil kpechɛɡre aa lɔ o bini ta. Lɛɛ mɛ le n dɔma nɔn ne vile ta.

¹⁵ Bɛ ɡel nee la su ba kpɔ mɛ, bɛ ɡel ń ka chɔ vile bini, kɛɛ seo ba kpo mɛ.

¹⁶ N Naa Korowii, che he nyina aa wola jaɡa dɔe ta, dɛ́ chaŋ mɛ. Berɛ sie n be, dɛ́ sune n nɛɛ kohona.

¹⁷ Bɛ he sie laa kpɔ men maa ɛ he bonɔɔ nɛ, n lɔ wenaale kohona bini, ba dɛ́ ba cha mɛ warane!

¹⁸ Ba n be dɛ́ ba lɛɛ mɛ, lɛɛ mɛ le n dɔma nɔn ta.

¹⁹ He ɡbabir na ɡɛ baa dɛ chɛɡ mɛ, ɡɛ sihiih aa dɛ kpo mɛ, baa wola men komɛlbwa yerɛ, he dɛ na n dɔma bwa.

²⁰ Chɛɡa ɡelɔ n bambile chɔɡ, dɛ ɡel n liire bwa damɛ. N dɛ nyin nomɛl ó fee ba larawe n bwara, n ta nɛn nae, kɛɛ nomɛl ba do mɛ ɡbemba, kɛ nɛn toole.

²¹ Lɔr aa dɛ kpo mɛ la, ba kpɔ tɛɡkpela do kondikwaa ta tɛ mɛ n di, nyoɡre ɡe aa dɛ kpo mɛ la, sennyɛɡaa ba tɛ mɛ n nyɔ.

²² Gɛ saŋ baa dɛɛ di kwaa dɛɛ lɛ ba sie la, ɡel siswɛm piɡ ba, ɡel ba kondikonjena dii ber ba kwaa baa lɔ naa a ta dɛ́ choɡli.

²³ Gel ba nyoŋe, ásɛ dɛɛ na wahala saŋ bɛlbwa.

²⁴ Gel he bandia kohona la ba ba nɛ, kpɔ he bandia waa do ɔma kohona ta ba nɛ.

²⁵ Gel ba sobɔr chɔ pɛɛ, nomɛlbwa bɛ ba tɛnte deene bini do,

²⁶ dɛkalkɛ ba dɛ ɛ nɛra haa tɛr ba deŋne la hɔhɔrɔwa, dɛɛ bol nɛra haa do ba bola, ba bonyɛɡa baa dɛ na la wa.

²⁷ Chwerɛ ba wechɔɡa baa ɛa bwa bil, bɛ ɡel ba ja he lɛɛ haa dɛ lɛ nɛra la ta.

²⁸ Gel ba fee ba sɔna le Mkpa Tɔn la bini, bɛ ba sɔna kpɔ ja he nɛra nɛ.

²⁹ N Naa Korowii, n bwara dɛ nyɛɡ, n hwɛɡa tonɛ, laɡ mɛ ir dɛ́ lɛɛ mɛ.

³⁰ Mɛɛ ɡo yelaa kpɛɛ Korowii sɔn, dɛ́ kpɔ jam tɛo o kan waa doa wa.

³¹ Anee dɛ su o siwi dɛ́ ɡwaa, kɛ baa kpɔ nabal baa sao ɛ saraha tɛo, a ɡwaa kɛ baa kpo nabal waa kpeɡa kɛrɛdɛ tɛo.

³² Nɛra baa dɛ fiɡ ba la na ɡɛ naa, ba sie ɛɛ lɛo, ásɛ banɔ la baa dɛ tomɛ Korowii dɔ ɡbemba.

³³ Korowii dɛ no nɛŋɡwɛɡra wii, waa nɛra baa laɡ ba do dea waa soh.

³⁴ Korowii kontaala aa lɔ nyundua ne harɛ kwaa bwa kpɛɛ Korowii, mpo ne kwaa aa lɔ o bini bwa ɡe kpɛɛro.

³⁵ Korowii ɛɛ lɛ Jerusalam tenaa, dɛ́ berɛ kwaa ma Juda harɛ bwɛjena, ásɛ o nɛra berɛ ka kpɔ harɛ la, dɛ́ so o ta.

³⁶ O bonɔɔna naanaree dɛ́ ka so o ta, nɛra baa dɛ nyin o waa laanee dɛ́ ka so bela.