Yela 68 - mzwDBL

Harɛ bɛl dɔma nɛɛ pɔe

Kooro Devid yel

¹ N Naa Korowii, ir nyu ne ásɛ dɛ lɔ he dɔma peɡre, he dɔma ɛɛ chwao le he sie.

² Gɛ peu yon ta dɛ́ kpɔ ninchuu kaa la, ɡɛɛ he kpɔ ba kaa ta. Gɛ ba yon kpɔ nii dɛɛ mwɛɛ tohkel la, ɡel nɛnchɔɡa sewɛ he sie ɡɛ.

³ Kɛ nɛra ba wa aa toɡra sie lɛo, baa hɛɡre hen Korowii sie, ba sie lɛo baa moo.

⁴ Hé ɡo yela kpɛɛ Korowii sɔn, hé kwaa ŋwɛnɛ tɛo, o le baama bini dɛɛ ba. O sɔne Korowii, hɛɛ hɛɡre o sie.

⁵ O ɛ bilalbii mɛɛ, dɛɛ che luhaahna habɔɔ. Onee Korowii waa soɡe o Dea waa do ɡoroŋ bini.

⁶ Korowiirii tɛ nɛra baa nya nɛra bɔr, ba yon so, dɛ le nɛra baa do ba dea, dɛ ɡel ba sie lɛ baa di ba nyu. Bambikpeɡ tena te, harɛ waa chɔɡa taa baa ba soɡa.

⁷ N Naa Korowii, haa tɔ he nɛra sie, dɛ valɛ kpɔ pua hɛŋle ɡbo harɛ ta la,

⁸ harɛ jiɡro asɛ bwaala nɛ he sie. Henee Sinai Bwejen Dɔɔ, Korowii Israel tena aa dɛ tomɛ.

⁹ N Naa Korowii, he ɡelɔ bwaala nɛ kohona, dɛ sɔɔh harɛ haa kpɔa baɡɛ yaa nyoa la ta.

¹⁰ He ɡelɔ he nɛra so o ta, asɛ he tesom kohona nomanta, he kpɔ tɛ nyaara.

¹¹ Korowii bol wa, ásɛ haahna warɛ kohona dɛ́ kaa bola ŋɔ,

¹² “Koranar ne ba laa tena chwao le dɛɛ kaa!” Haahna baa ka dem la kpɔ laala baa kpɔa laa ta la bɔne dɔŋa.

¹³ Nɛra baa kaa dɛ do bela dɛɛ daah peera la, dɔ suuɡapoŋa baa kpɔa dawɛ kwehre kena ta. Suuɡaswɛm dawɛ a kena nyoo dɛɛ nyɛɡle.

¹⁴ Korowii Waa Ɛ Kpeɡri Bwa Dɔɔ aa lɔ koranar peɡre harɛ la ta la, a do kɛŋɔ dombwea aa lee Salmɔn Bwejen ta ken.

¹⁵ Bwejena aa lɔ Basan harɛ jaŋne kaa nyundua kɛrɛdɛ, bwea paaɡe a dor kɛŋɔ deŋɡarere ken.

¹⁶ Ɛrɛɛ he bwejena haa lɔ Basan, ɛɛ nyiŋi Korowii bwe waa do ɡoroŋ, kɛŋɔ nɛn aa dɛ we o dɔŋ bwara dɛɛ nyiŋu nɔɔ? Korowii ɛɛ so bela saŋ bɛlbwaa dɛɛ la!

¹⁷ Korowii dɔ kwaa aa do kɛ torɔɡore, baa wola won kura, dɛ le Sinai Bwejen ta, dɛɛ ba o Dea la ta.

¹⁸ O teehnɔ kaa nyundua, dɛ lawɛ nɛra waa laɡ ba laa ta kaa, asɛ deŋnekpeɡ tena kpɔ koŋkɛɛla baa tɛo dɛ ŋɔ, Korowii ɛɛ ba so belaa.

¹⁹ Ya kpɛɛ Korowii yaa dɛ tomɔ, onee ya Lɛɛ la. Tɔpere bwaa wɛɛ nyiŋi ya nɛ, ya waa bwa dawɛ o nɛ.

²⁰ Korowii yaa dɛ tomɔ ɛ Korowii waa dɛ lɛ yaa, Nemenɛ Korowii won yaa lɛɛ dɛ́ le seo nyoa.

²¹ Kasinteŋ, Korowii ɛɛ paɡre o dɔma nyuunee, banɔ la ba taa lɔ wechɔɡa ɛɛ ta la.

²² Korowii ŋɔ, “Mɛɛ le he dɔma ne Basan harɛɛ ba, mɛɛ le ba ne mpo vile binii,

²³ ásɛ he valɛ kpɔ ba chal ta, he nyootena ɡe kpɛla ɡɛ aa dɛ nyin.”

²⁴ N Naa Korowii, nɛra bwa nae he valɛ baa kaa, Korowii maa dɛ tomɔ o ɛ n kooro la baa jo o Dea bini.

²⁵ Yelɡoola tɔ sie, nɛra baa dɛ lɔ yela teŋɛ, asɛ bitoli baa dɛ yiiɡi loŋa do ba baah ta.

²⁶ Hé kpɛɛ Korowii bela o nɛra aa wara dɛ cheme. Israel tena bwa, hé cheme dɛ́ kpɛɛro.

²⁷ Bɛnjamen dea nɛra baa wola kanɛ la tɔ sie, Juda dea nomonome teŋɛ, ásɛ Sebulon ne Naftale deene nomonome ɡe teŋɛ.

²⁸ Ya Naa Korowii, chaɡle he kpeɡri, kpeɡri he fa aa chaɡle ya nɛɛ la.

²⁹ He Dea waa lɔ Jerusalam nomanta, koranar ɛɛ kpɔ koŋkɛɛlaa ba tɛɛ.

³⁰ Tɛr Ijipt nɛra baa do kɛŋɔ kpɔɡ bini ola, aa chɔ nee nyoa la deŋne. Tɛr harɛre nɛra baa do kɛŋɔ nabala, dɛ koo nabii bini la deŋne, ka tel saŋ baa ba ɡuŋi harɛ, dɛ́ kpɔ ba suuɡapoŋa ba tɛɛ. Lɔ harɛre nɛra ba sie aa dɛ lɛ laa yoi ta la bwa peɡre.

³¹ Nomonome ɛɛ che Ijipt tena naa taa ba, ásɛ Itiopia tena ɡe kpɔ ba te ba do Korowii lɔɡa.

³² Harɛre nɛra, hé ɡo yela kpɛɛ Korowii, hé ɡo yela kpɛɛro,

³³ onee soɡe nyundujaɡla, dɛ do le saŋ la bwa. Hé cheɡ deŋne no kɔɡra waa dɛ kɔɡre kohona.

³⁴ Hé bol o kpeɡri waa dɔa wa, o nyanyini bɔle Israel tena nɛ, o kpeɡri do nyundua ɡe.

³⁵ Korowii le o Dea dɛɛ ba naa, ɔmee kohona dɛ chole nɛra nɛ. Onee Israel tena ɛɛ tomɛ, wɛɛ tɛɛ ba kpeɡri. Hé kpɛɛro!