Yela 66 - mzwDBL

Korowii kpɛɛra ne o jaama

Yelɡoɡoo bɛl yel

¹ Nɛra haa lɔ harɛ nɔ ta, hé ɡo silɛɛ yela kpɛɛ Korowii!

² Hé ɡo yela kpɛɛ o sɔn waa dɔ jirima la, hé duuru dɛ́ kpɔ jirima tɛo.

³ Hé ŋɔ Korowii be ŋɔ, “He we-ɛɛla dɔ nyokpoa, he kpeɡri haa dɔa ɡe do kan kohona a ɡel he dɔma kpɔ ɔmee baa ɡuŋi he sie.

⁴ Harɛre nɛra bwa dɛ tomɛ, dɛ ɡo yela dɛɛ kpɛɛre, ba ɡo yela dɛɛ kpɛɛ he sɔn.”

⁵ Hé ba, dɛ́ ba na waa Korowii aa ɛa, nyokpowe-ɛɛla waa koh nɛwɛnyina waa dɛ ɛ.

⁶ Onee ɡela mpo hweeh, harɛpɛɛ hol chɔ, ya naawa valɛ kpɔ o ta le. Belaa ya sie lɛ, waa Korowii aa ɛa wa.

⁷ O cheɡɛ o kpeɡri ta dɛɛ di kora saŋ bɛlbwa. O sie lɔ harɛ nɔ ta nɛra bwa nɛ, deŋnekpeɡ tena bɛ habɔɔ berɛ kpoo.

⁸ Harɛ nɔ ta nɛra bwa, hé kpɛɛ Korowii yaa dɛ tomɔ, hé ɡel baa no kpɛɛra haa dɛ kpɛɛro la bobɛlbwa.

⁹ O nyiŋi ya nɛɛ ya ta so le, o ta ɡelɛ ya lɔ naa dɛ chole.

¹⁰ N Naa Korowii, he daah yaa na kɛŋɔ ba yon kpɔ suuɡapoŋ do nii ta, dɛ laa o doŋa bɛlbwa kpɔ o ta la ken.

¹¹ He ɡelɔ ya le bel haa harɛ yaa ta, dɛ kpɔ bontɔɡa dawɛ ya nɛ.

¹² He ɡelɔ ya dɔma pɔ ya nɛ, ya na wahala kɛŋɔ nii ne nee aa chɔɡ nɛra kwaa ken, kɛ taraken, he berɔ kpɔ yaa ba harɛ o taa soma ta.

¹³ Mɛɛ kpɔ saraha kwaa baa fuah ba tɛɛ he Dea, dɛ́ chuɡri n nyobaɡa maa baɡɛ la.

¹⁴ Mɛɛ kpɔ kwaa maa baɡɛ nyoa n wenaale saŋ laanee ba tɛɛ.

¹⁵ Mɛɛ kpoo peeraa bá fuh ɛ saraha he saraha kon la ta, dɛ́ lawɛ pebala ne nabala dɛ boohna ba tɛɛ, ásɛ a ninchuu la tɛr dɛɛ kaa nyundua.

¹⁶ Hé ba, dɛ́ ba no, he nɛra haa dɛ tomɛ Korowii, ásɛ n baɡle waa waa ɛa tɛ mɛ.

¹⁷ N wio noo ŋɔ ó cha mɛ, asɛ dɛ ɡo kpɛɛra yela tɛo.

¹⁸ Dɛ n vɛh n wechɔɡa bola aa, Korowii fe ta n be noɛ.

¹⁹ Kasinteŋ, Korowii no n wesoŋa, o no n wii maa wia noo la.

²⁰ Korowiirii dɔ jam, dɛkalkɛ o ta n wesoŋa vɛɛh, kɛɛ dɛ berɛ habɔɔ kpo mɛ, o nyina aa wola jaɡa dɔe ne.