Yela 65 - mzwDBL

Korowii kpɛɛra ne o jaama

Kooro Devid yel

¹ N Naa Korowii, henee chɛ kɛ yá kpɔ duure tɛɛ bwɛjen Saayɔn, dɛ́ chuɡri ya nyobaɡa yaa baɡɛ la,

² dɛkalkɛ henee dɛɛ no ya wesoŋa. Nɛra ɛɛ le bobɛlbwaa ba he be dɛ́ ba tomɛ,

³ ba wechɔɡa aa ɡwaa ba nɛɛ la wa, ásɛ he kpɔ ba wechɔɡa kɛ ba.

⁴ Nɛra haa lee ba ŋɔ bá ba so he Dea bela la, ba na som. Ya sie ɛɛ lɛ kondɛɛɡa haa swee yaa a do he Dea waa do ɡoroŋ la taa.

⁵ N Naa Korowii haa dɛ lɛ yaa, he cheɡɛ he nyokpowe-ɛɛla ta, dɛ no ya wesoŋa. He nɛɛ nɛra baa lɔ harɛ jaɡa bwa, ne banɔ la baa lɔ mpo jaɡa bwa ɛɛ hwɛɡɛ.

⁶ He kpeɡri taa he che dɛ ta bwejena dɛ chaɡle kpeɡri kohona haa dɔa.

⁷ He ɡelɔ mpo nehɛma sii nyoa hel, asɛ harɛre nɛra nyoa sɔɔh, moola baa dɛ moo ta.

⁸ Bambiteŋa kohona chole harɛre nɛra nɛ, he wejena haa ɛa la wa. He we-ɛɛla ba silɛɛ ne ba tɛ nɛra baa lɔ harɛ nɔ bwa ta, baa moo.

⁹ He dɛ dawɛ ya wa, dɛ ɡel bwaala ɛɛ nɛ harɛ nɔ ta, o do wer dɛɛ ɛ konduula kohona. He ɡelɔ nenabɔɔne bwa suuɡi, nɛra dɔ kondikwaa dɛɛ di. Gɛ haa ɛa laanee teŋa nɔ,

¹⁰ he nɛ bwaala tɔɡa kooni baa para ta, asɛ harɛ bwa sɔɔh kohona. He ɡelɔ o nɛ kompar ta, harɛ pwɛr a won le dɛ kpeɡ.

¹¹ He wer haa doa nomanta, he ɡelɔ kondikwaa ba kohona, dɛ bu harɛ ta bobɛlbwa.

¹² Hale kpɔɡa moɡɛ pua hɛŋle ɡbo harɛ ta, asɛ deŋɡarere do wer kɛŋɔ nɛra sie aa lɛa ken.

¹³ Peera lɔ kpɔɡ bini bobɛlbwa, dɛɛ di, fɛlembɔjena bwa su mea, aa ɡo yela dɛɛ moo silɛɛ ne kɛ nɛra ken.