Yela 61 - mzwDBL

Nɔn kpɔe dɛ́ tɔ nɛn nɛɛ wesoŋa

Kooro Devid yel

¹ N Naa Korowii, no n wii, no n wesoŋa!

² N lɔ bojaŋ harɛ jaɡa, dɛ di suna wi dɛɛ noe! Laɡ mɛ kaa bela maa ka dɔ n nyu,

³ dɛkalkɛ henee kpɔ nɔn dɛɛ tɔ n nɛ, dɛ do kɛ danjwɛkpeɡ n dɔma sie.

⁴ Gel n so he Dea bela saŋ bɛlbwa dɛɛ la, laɡ mɛ sɔh he lɔɡa, kɛŋɔ jal yon lawɛ o bii do o kena lɔɡre la.

⁵ N Naa Korowii, he no nyoa maa baɡɛ la, dɛ tɛ mɛ kwaa haa kpɔa dɛɛ tɛ nɛra baa dɛ tomɛ.

⁶ Kpɔ tɔpera ja kooro mkpa ta, dɛ́ ɡel o wobɛlbwa do wer dɛɛ tɛo, ka tel o naanar baa ka ba bwa bini.

⁷ N Naa Korowii, ɡel ó so he sie di kora dɛɛ la, dɛ́ kpɔ he nyina aa wola jaɡa dɔe, ne he kasinteŋ haa dɔa tɔ o nɛ.

⁸ Anee dɛ́ ɡel n ɡo yela kpɛɛ he sɔn saŋ bɛlbwa, dɛɛ chuɡri n nyobaɡa tɔpere bɛlbwa.