Yela 60 - mzwDBL

Lɛɛ wesoŋa

Kooro Devid yel

¹ N Naa Korowii, he baah fa di ya nɛɛ dɛ vɛh yaa, he baah di ya nɛɛ te, kɛ berɛ lawɛ yaa ba he be taraken.

² He ɡelɔ harɛ jiɡri, o bini pere. Berɛ kwaa tɔɔɡe bɔɔne la, dɛkalkɛ a dɛ paɡri.

³ He ɡelɔ he nɛra na wahala kohona, ya valɛ dɛɛ yɛɛɡe kɛŋɔ yaa nyɔ sen dɛ dɛɛ ken.

⁴ He ir he fraŋkaa dɛ́ kpɔ kah nɛra baa dɛ ɔmɛ, ɡɛ aa ɛ ásɛ ba dɔma bɛ ban kpoo.

⁵ Lɛ yaa he kpeɡri ne, dɛ́ no ya wesoŋa, ɡɛ aa ɛ he lɛ nɛra haa dɛ nyin ba la.

⁶ Korowii bol waa o Dea bela waa do ɡoroŋ la dɛ ŋɔ, “Mɛɛ yo bwɛjen Sɛkem tenaa, dɛ́ pɔ ba nɛ, dɛ́ bɔne o ne Sukot Fɛlembɔjen bini tɛ n nɛra.

⁷ Gelead harɛ ne Manasɛ dea harɛ bwa ɛ n kwa. Efrem harɛ do kɛŋɔ n laa ɡbɛrɛ, asɛ Juda harɛ ɡe do kɛŋɔ n koodaŋɡbala.

⁸ Moab harɛ nɛra ɛ n bonɔɔna, ba do kɛ loɡ maa dɛ loo kwaa o bini ken, mɛɛ kpɔ n naŋɡawaa ta Edom harɛ ta. N dɛ moo, dɛkalkɛ n pɔ Filisti tena nɛ.”

⁹ N Naa Korowii, umee dɛ́ kpɔ mɛ jo bwɛjen baa ma danjwɛkpeɡ baro nɔ ta nɔ? Umee dɛ́ tɔ n sie kaa Edom ɔ?

¹⁰ He deno berɛ habɔɔ kpo yaa kɛɛ? Haa ya laa tena sie tɔ ka yo ya dɔma kpa aa?

¹¹ Cha yaa yá won pɔ ya dɔma nɛ, nɛwɛnyini chae ɡɛ bɛlbwa naa, a bwa dɛ ɛ pɛɛpɛɛ.

¹² Korowii ja ya nɛ aa, yaa yoo, dɛ́ pɔ ya dɔma nɛ. Wɛɛ tiɡri ya dɔmaa do harɛ.