Yela 6 - mzwDBL

Nɛn waa lɔ wekpeɡa ta chae wesoŋa

Kooro Devid yel

¹ N Naa Korowii, bɛ ɡel he baah di hé pwaah mɛ, bɛ ɡel he baah di kohona hé tɛr n deŋne.

² N Naa Korowii, n ɡwɛɡrɔ, n poori, na n sum. N hoɡa bini bwa dɛ wee mɛ, chaah mɛ.

³ N bwadabii bwa dɛ wee mɛ taeh. N Naa Korowii, saŋ besoo he ba cha mɛ nɔ?

⁴ N Naa Korowii, ba lɛɛ mɛ. Che he nyina aa wola jaɡa dɔe la ta, dɛ́ lɛɛ mɛ le seo ta.

⁵ Nɛn sewaa, waa he waa lii kpa. Umee dɛɛ kpɛɛre lalabwɛ ɔ?

⁶ N pɛmɔ dɛ ba koh, jwaana bɛlbwaa n sinii ɛɛ yɔɔ mɛ kalaŋ ta, dɛɛ pweh n kapuri bwa!

⁷ Maa na kɛrɛdɛ kpa, wii dɔma aa ɡela mɛɛ wi nomanta.

⁸ Wechɔɡ-ɛɛra, hé le n sie! N Naa Korowii, no n wii.

⁹ O no n suna wii, wɛɛ sɛh n bee.

¹⁰ Sihiih ɛɛ kpo n dɔma bwaa ba bwara yɔr, ásɛ Korowii ɡel ba berɛ, dɛ́ den kpɔ baŋaɡola kaa.