Yela 59 - mzwDBL

Nɔn kpɔe dɛ́ tɔ nɛn nɛɛ wesoŋa

Kooro Devid yel

¹ N Naa Korowii, lɛɛ mɛ le n dɔma nɔn ta, kpɔ nɔn tɔ n nɛɛ le nɛra baa cheɡɛ n nɛɛ nɔn ta.

² Lɛɛ mɛ le wechɔɡ-ɛɛra nɔn ta, banɔ la baa dɛ kpoo nɛra la.

³ Na ɡɛ baa kaa sɔh dɛɛ kpaah mɛ! Nɛnchɔɡa dɛ vɔrɔwe n vɔrɔwa, kɛ dɛ n ta wechɔɡa bɛlbwa ɛɛ.

⁴ N ta wechɔɡa bɛlbwa ɛɛ, kɛ ba ɡe ɡarɛ dɛɛ nyin dɛ́ yoo mɛ. N Naa Korowii, ir nyu ne, dɛ́ cha mɛ n waa nɔ ta.

⁵ Korowii waa ɛ Koronar Bwa Kooro, Israel tena aa dɛ tomɛ, ir nyu ne, dɛ́ ba tɛr nɛra baa wola hen tomɛ la deŋne, bɛ dɔma baa ɛ nyubinikpeɡ tena la nɛɛ sune.

⁶ Ba yon berɛ ba jɔmɔra, dɛ nyee nyena kɛŋɔ nyootena ken, dɛɛ bɛɛ bwɛjen la fɔɡbaahna.

⁷ No chɛɡa ne waa aa dɛ le ba nyoo, ba nyondoŋa do kɛ keri ken, kɛ dɛ ɡee lii kɛŋɔ nomɛlbwa aa ba be no.

⁸ Kɛ hen n Naa Korowii te, he dɛ mam ba, he dɛ di nɛra baa wola hen tomɛ la loro.

⁹ N Naa Korowii haa ɛ n Kpeɡnɛn, he do kɛŋɔ danjwɛkpeɡ n chwa baa marɛ.

¹⁰ Korowii maa dɛ tomɛ, he dɛ nyin n wa, hɛɛ ba n bee dɛ́ ɡel n na n dɔma chola.

¹¹ Korowii haa dɛ tɔ yaa ɡbemɡbe, bɛ ban kpoo, ɡɛ laa aa, n nɛra ɛɛ ba sooh. Che he kpeɡri ta dɛ́ lɔ ba peɡre, dɛ́ pɔ ba nɛ, dɛ́ sɔɔh ba nyoa.

¹² Wechɔɡa su ba nyoo, che ba nyoa wobol ta dɛ́ ɡel ba laɡ ba ba mbarafo baa dɛ ɛ ta. Koh nyosone ne taahna baa dɛ taah nɛra la wa,

¹³ dɛ́ chɔɡ ba he bandia ne, ka tel kɛŋɔ ba bwa aa tona. Ásɛ nɛra baa lɔ harɛ jaɡa bwa jemɛ kɛŋɔ hen Korowii, he dɛ di kora Israel tena nɛ.

¹⁴ Ba yon berɛ ba jɔmɔra, dɛ nyee nyena kɛŋɔ nyootena ken, dɛɛ bɛɛ bwɛjen la fɔɡbaahna.

¹⁵ Ba dɛ ɡaaɡe dɛɛ nyin kondikwa, ba ta vaɡrɛ aa, ba yon dɛɛ ŋoo kɛŋɔ nyootena ken.

¹⁶ Mɛɛ ɡo yelaa kpɛɛre he kpeɡri la wa, ásɛ chɔɔ bɛlbwa ɡe n ɡo yela kpɛɛre he nyina aa wola jaɡa dɔe la wa, dɛkalkɛ he do kɛŋɔ danjwɛkpeɡ, waa puu mɛ naa, ń chwa baa marɛ.

¹⁷ N Naa Korowii haa ɛ n Kpeɡnɛn, mɛɛ ɡo yelaa kpɛɛre, he do kɛŋɔ danjwɛkpeɡ n chwa baa marɛ, N Naa Korowii, henee dɛɛ nyin n wa.