Yela 58 - mzwDBL

Nyubinikpeɡ tena deŋne tɛra wesoŋa

Kooro Devid yel

¹ Hé koranar, hé bol waa dɛɛ pa bole aŋwɛnɛ ta naa? Hé bol nɛra waa dɛɛ pa bole ɡɛ aa chɛ aa?

² Akai, wechɔɡa haa lii dɛ́ ɛa ɡboo lɔ he bambili bini, waa aa ba naɡra ne ɡboo hɛɛ ɛ harɛ la ta.

³ Wechɔɡ-ɛɛra dɛ ɛ wechɔɡa ba soɡa bini bwa, dɛ le awola baa lol ba, dɛɛ teŋe nyosone.

⁴ Ba nyoa wobol do kɛ tɛɡchɔɡa, kɛŋɔ harɛkonchɔɡe aa choɡe nɛn dɛ tɔɔɡe o deŋna ken.

⁵ Waa tɛɛɡa te waa dɛ ɡo harɛkon yela be no, hale dɛ o jemɛ waa la ɡɛ bɛlbwa kwaraa noo.

⁶ N Naa Korowii, fome n dɔma nyena aa do kɛŋɔ nyujentena nyenkpaahna.

⁷ Gel ba nyoɡre kɛŋɔ nee aa pala ba kaa ken. Ba harɛ ba tori dɛɛ ba tae yaa, ɡel ba hɛma nyoo taŋ.

⁸ Gel ba hol kɛŋɔ ketere dɛ́ serewe, kɛɛ bie baa haro ta, waa wola wee nae mɔɔ la.

⁹ Mɔɔ ba jemɛ la, dɛ ba teŋ ba ta kɛŋɔ kpɔɡa ken, hen Korowii ɛɛ perewi baa ta he bandia kohona la ne, ɡɛ saŋ ba taa soɡe le la.

¹⁰ Nɛra ba wa aa toɡra sie ɛɛ lɛo kɛŋɔ wechɔɡ-ɛɛra aa dɔ deŋnetɛra, baa valɛ ba chal taa.

¹¹ Belaa nɛra ɛɛ ba ŋɔe ŋɔ, “Kasinteŋ, nɛra ba wa aa toɡra dɔ ba kembɔr, Korowii lole kpela, dɛ bol nɛra waa dɛɛ pa bole, harɛ nɔ ta.”