Yela 57 - mzwDBL

Chae Wesoŋa

Kooro Devid yel

¹ N Naa Korowii, na n sum, dɛkalkɛ henee n chwa baa marɛ dɛ dɔ bosɔɔhna. He lɔɡaa n chwa baa sɔh, kɛŋɔ jal yon lawɛ o bii do o kena lɔɡre, ka tel saŋ harɛ chɔɡa aa baa kaa.

² N wio dɛɛ no hen Nemenɛ Korowii, henee dɛɛ tɛ mɛ komɛlbwa maa dɛ nyin.

³ Hɛɛ no n wesoŋaa le nyundua dɛ́ ba lɛɛ mɛ, dɛ́ pɔ nɛra baa dɛ fiɡ mɛ nɛ. Hen Korowii ɛɛ baɡle he nyina aa wola jaɡa dɔe, ne he kasinteŋ haa dɔa laanee n nɛ.

⁴ N dɔma bar mɛ cheme, ba do kɛŋɔ nyujentena lɔr aa dɛ kpoa, aa nyin nɛra ola dɛ́ di ken. Ba nyena do kɛŋɔ lampeare ne hɛma, ba nyondoŋa nyɛɡre kɛ keri ken.

⁵ N Naa Korowii, ɡel ya na he kan haa doa nyundua, ásɛ he jirima tɔ harɛ nɔ ta bwa.

⁶ N dɔma haɡre bela, dɛ́ laɡ mɛ, suna ɡboo mɛɛ di. Ba kwi nafuɡe n ŋwɛnɛ ta, dɛ́ fee laɡ mɛ, kɛ ba ɡbaɡba berɔ le o bini.

⁷ N Naa Korowii, he nɛɛ mɛɛ hwɛɡɛ kohona, mɛɛ ɡo yelaa kpɛɛre.

⁸ Mɛɛ iruu che, dɛ́ kpɔ janjela ne kwaa bwa soo siwi lɔ yela! Mɛɛ feluu ir mɔɔ bɔr chaah.

⁹ N Naa Korowii, mɛɛ jaame harɛre nɛra bwa binii, mɛɛ ɡo yelaa kpɛɛre nɛnlaa baahnee.

¹⁰ He nyina aa wola jaɡa dɔe kan dɛɛ tel nyundua, he wa aa dɔ kasinteŋ ɡe ɛɛ tel bela.

¹¹ N Naa Korowii, ɡel ya na he kan haa doa nyundua, ásɛ he jirima tɔ harɛ nɔ ta bwa.