Yela 56 - mzwDBL

Korowii yaradae wesoŋa

Kooro Devid yel

¹ N Naa Korowii, na n sum, n dɔma dɛ ti mɛ sibeɡra ne tɔpere bɛlbwa, dɛ́ yoo mɛ.

² Tɔpere bɛlbwaa ba teŋɛ dɛɛ ɡaaɡe n bɔr, ba warɔ kohona dɛɛ yoo mɛ.

³ Nemenɛ Korowii, ɔmee laɡ mɛ naa, mɛɛ kpɔ n tenee dawɛ he nɛ.

⁴ Hen Korowii nɛɛ n kpɔ n te dawɛ, maa ɔmɛ, henee mɛɛ ba kpɛɛra, he nyoa haa baɡ mɛ la wa. Bɔkwaa nɛwɛnyini waa won sewa ɛɛ ba wona ɛɛ mɛ nɔ?

⁵ N dɔma nyin waa dɛɛ dawɛ n nɛɛ tɔpere bɛlbwa, saŋ bɛlbwaa baa vɔrɔwe n vɔrɔwa dɛ́ kpo mɛ.

⁶ Ba pɛ nyoa ka sɔh, dɛɛ nyiŋi wobɛlbwa maa dɛ ɛ, ba siwi beɡre n kpoe wa.

⁷ N Naa Korowii, tɛr ba deŋne ba wechɔɡa wa, yoo ba, dɛ́ pɔ ba nɛɛ he bandia ne.

⁸ He na ɡɛ n bwara aa dɛ nyɛɡ, he ɡbabir jemɛ n suna maa dɛ di. A toole he tɔn bini ɡɛ naa?

⁹ Awola maa wi yerɛ la, n dɔma ɛɛ berɛ habɔɔ, waa maa jema laanee kɛŋɔ hen Korowii ja n nɛ.

¹⁰ Hen Korowiirii mɛɛ kpɛɛ, he waa laanee mɛɛ duu.

¹¹ He nɛɛ n kpɔ n te dawɛ, maa wola ɔmɛ, bɔkwaa nɛwɛnyini waa won sewa ɛɛ ba wona ɛɛ mɛ nɔ?

¹² N Naa Korowii, henee n baɡɛ nyoa, mɛɛ kpɔ n jam kwaa ba tɛɛ.

¹³ He lɛɛ mɛ le seo ta, he ta ɡelɛ n dɔma pɔ n nɛ. Anomanta, mɛɛ wono dɛɛ valɛ he sie, he nii waa dɛ chaah dɛɛ tɛ nɛra mkpa la bini.