Yela 55 - mzwDBL

Nomɛl o dɔŋ aa leo tɛ wesoŋa

Kooro Devid yel

¹ N Naa Korowii, no n wesoŋa, bɛ sie laa kpɔ waa maa dɛ soŋe nɔ ta,

² no n be dɛ́ chaŋ mɛ, n liire chɔɡ waa aa dɛ ha mɛ ta,

³ n dɔma aahra baa dɛ aah mɛ, ne fiiɡa baa dɛ fiɡ mɛ nomanta, ba kpɔ wenaale ba ta n nɛ, ba muɡli n baah dɛ hah mɛ.

⁴ N bambile dɛ lɔ, seo ɡelɔ n bwara yɔr n ɔmɛ dɛɛ chel kohona.

⁵ Ɔmee ne bochela chole n nɛ, asɛ n bambile teŋe kohona.

⁶ Dɛ n dɔ kena kɛŋɔ kweah aa, n fe ɛɛ iruu kaa bojaŋ dɛ́ ka onɛ.

⁷ N fe ɛɛ iruu kaa bojaŋ, dɛ́ ka so pua hɛŋle ɡbo harɛ ta.

⁸ Dɛ́ ɛ warane ka nyin sobɔr, dɛ́ le peukpeɡ waa dɛ ta dɛɛ nɛ bwaala bini.

⁹ N Naa Korowii, ɡel n dɔma wili, ba bɛ won bol wa! N na wesaɡasaɡare ne yoi bwɛjen la ta,

¹⁰ ba bɛɛlɔ dɛɛ bar o danjwɛɛre chɔɔ ne jwaana, dɛ kpɔ wechɔɡa ne waa aa wola were su o bwa.

¹¹ Nɛnchɔɡa lɔ bwɛjen la ta bobɛlbwa. Ba cheɡɛ ba kpeɡri ta, dɛɛ fiɡ ba dɛɛ neɡ ba o fɔɡbaahna.

¹² Dɛ n dɔmee dɛɛ chɛɡre mɛ naa, n fe ɛɛ lɛo do. Dɛ nɛn waa hah mɛ ɡee dɛɛ mam mɛ naa, n fe ɛɛ laa n tenee kpɔ o nɛ.

¹³ Kɛ hen haa ɛ n chamenate la, henee dɛɛ ɛɛ mɛ. N dam n ne haa dɛ valɛ,

¹⁴ ya bwa fa pɛ dɛɛ ɛ waa kɛrɛdɛ ken, dɛ kaa tomɛ Korowii o Dea.

¹⁵ N Naa Korowii, ɡel n dɔma piɡri serewe, ɡel ba huɡ ba dɛ ba siwi ta lole, dɛkalkɛ wechɔɡa lɔ ba bambile ne ba deremi.

¹⁶ Kɛ n wio no hen Korowii, asɛ he no dɛ cha mɛ.

¹⁷ Jwaana, chɔɔ ne webaŋa, n suna wii ne n pɛma dɛ tel he be, asɛ hɛɛ no n taa.

¹⁸ Hɛɛ berɔ lɛɛ mɛ le n dɔma baa wara, laa maa kaa yoo ba ta, dɛ́ ba n ne sɔnɔnɔɔ ken.

¹⁹ Hen Korowii, henee dɛɛ di kora saŋ bɛlbwa, hɛɛ no n wesoŋaa dɛ́ yoo ba, dɛ́ pɔ ba nɛ. Dɛkalkɛ ba vɛh ba liire chara, baa hen ɔmɛ.

²⁰ N dam tenten n ne o fa aa dɛ valɛ yo o daamanar, dɛ chɔɡ fɔo o ne baa fɔwa.

²¹ O nyoa wobol pwɛre kɛŋɔ noo ken, kɛ dɛ liichɔɡa lɔ o bambile ta, dɛ won mɔna kɛŋɔ kerenyɛɡ ken.

²² Kpɔ he waa bwa dawɛ Korowii nɛ, wɛɛ che he habɔɔ, waa ɡel nɛra ba wa aa toɡra chole bwa.

²³ Kɛ hen Korowii, hɛɛ taɡɛ nɛra baa dɛ kpoo nɛra, ne nyosonteŋna laanee do ba lalbɔɔne bini, bá serewe mɔɔ ba saŋ tel. Kɛ n te, n kpɔ n te dawɛ hen Korowii nɛ.