Yela 53 - mzwDBL

Nɛwɛnyini nyubinikpeɡ wa

Kooro Devid yel

¹ Gɛna ɡboo yon ŋɔ, “Korowii toole.” Nɛndɛɛɡe bɛlbwa toole ba bini, wechɔɡa ɡboo ba bwa, nɛmbeŋkpoŋ kwaraa toole dɛɛ ɛ wedɛɛɡa.

² Korowii lɔ nyundua, dɛ ba sie ne harɛ, dɛɛ nyiŋi nɛwɛnyina kɛŋɔ bɛl dɔ wejema dɛɛ nyin o Korowii bɔr dɛ́ tomɔ.

³ Nomɛlbwa berɛ habɔɔ kpoo, nɛndɛɛɡe bɛlbwa toole ba bini, bɛlbwa toole dɛɛ ɛ wedɛɛɡa, nɛmbeŋkpoŋ kwaraa toole.

⁴ Korowii ŋɔ, “Amɔ wechɔɡ-ɛɛra ɛɛ hweli waa bwaa yaa? Ba dɛ liɡli n nɛra kɛŋɔ baa dɛ di kwaa ken, baa wola wi dɛɛ no men Korowii.”

⁵ Belaa ba do ɔmee su ba bwa, kɛ dɛ a ta chɛ kɛŋɔ bá fe ɔmɛ. Korowii lɔ nɛra baa yo heyaa la hoɡa peɡre, he ɡelɔ sihiih kpo ba, dɛkalkɛ Korowii vɛɛh ba.

⁶ N dɛ soŋe kɛŋɔ mkpa lɛɛ le Saayɔn, dɛ́ ba o nɛra Israel tena be. Dɛ Korowii berɔ ba lɛ o nɛra Israel tena ja aa, ba sie ɛɛ lɛo.