Yela 50 - mzwDBL

Korowii toma ŋwɛnɛdɛɛɡe ta

Asaf yel

¹ Nemenɛ Korowii waa dɔ kpeɡri kohona yerɛ nɛra baa lɔ harɛ nɔ ta bobɛlbwa ba cheme, le wee leebɔr ba kaa wee cholibɔr.

² Korowii do kɛ kandea dɛɛ chaah dɛ le bwɛjen Saayɔn waa wera kohona ta.

³ Korowii yaa dɛ tomɔ dɛ ba naa, waa sɔeh dɛɛ ba, nijena dɛ́ tɔ o sie, ásɛ peukpeɡ ta baro dɛɛ cheme.

⁴ O ŋɔ nyundua ne harɛ di danseɛ kɛŋɔ nɛra, ásɛ o bol o nɛra wa, dɛ́ pa ba bole.

⁵ Korowii berɔ ŋɔ, “N dɛ nyin kɛ n nɛra maa lee ba cheɡ tɛ n te boa ba nyoa, nɛra baa kpo kon ɛ saraha, a che tɛ fɔo n ne baa fɔwa la.”

⁶ Kwaa aa lɔ nyundua dɛ baɡle kɛŋɔ Korowii waa toɡrɔ, dɛkalkɛ onee bol nɛra waa dɛɛ pa bole.

⁷ Korowii ŋɔ, “Hé no, n nɛra Israel tena, maa he waa bola ba dɛ́ tɛ heya, menee Korowii haa dɛ tom mɛ.

⁸ Maa heyaa kah ŋɔ kwaa haa kpoora ɛ sarahare, kɛɛ kwaa haa fuah ɛ sarahare n sie saŋ bɛlbwa la aa were.

⁹ Maa nabala nyin dɛ́ le he naleɡa ta, kɛɛ boohna dɛ́ le he boohna leɡa bini,

¹⁰ dɛkalkɛ kpɔɡ bini ola bwa ɛ n kwa, a ne nae aa lɔ deŋɡarere kaɡboŋa ta bwa.

¹¹ N jemɛ jumbii aa lɔ bwejena dor wa, asɛ koŋkwaa maa taa bwa ɛ n kwa.

¹² Dɛ lɔr dɛ kpo mɛ naa, maa he bee bol, dɛkalkɛŋɔ harɛ nɔ ne kwaa aa lɔ o ta bwa ɛ n kwa.

¹³ N dɛ chwe nabala ol kɛɛ boohna chalee mɛɛ diɔ?

¹⁴ Hé kpɔ jam ɛ saraha tɛ men Korowii, dɛ́ ka chuɡri he nyobaɡa bwa Nemenɛ Korowii be.

¹⁵ Hé yer mɛ he wenaale tɔpere aa, mɛɛ ba lɛ heyaa, ásɛ he kpɔ duure tɛ mɛ.”

¹⁶ Kɛ Korowii ŋɔ wechɔɡ-ɛɛra la be ŋɔ, “Ɛrɛɛ me Mmarare dawɛ he nyoo hɛɛ kura, kɛɛ hɛɛ bol n ne he fɔo la waa nɔɔ?

¹⁷ He hah waa maa do heyaa a ta la, dɛ kpɔa ta habɔɔ.

¹⁸ He na ŋwɛɛ bɛlbwa naa, he kpɔɔ dɛɛ berɛ he dam, he ne nɛra baa dɛ bɔ jwamanee dɛɛ valɛ.

¹⁹ Wobochɔɡa ɡboo su he nyoo, he do ɡbaŋre nyosone teŋa ta.

²⁰ He won soɡa dɛɛ bol he dɔŋa bwara wechɔɡa, dɛɛ chɔɡ he ɡbaɡba nyabii.

²¹ Anɔ bwaa hɛɛ ɛ, asɛ n tɔ nyoa, he dɛ lii kɛŋɔ n do kɛ heya. Kɛ n dɛ kah heya, dɛ́ kpɔ waa haa ɛa bwa bil he sie.”

²² Hé no, he banɔ la haa soh men Korowii waa la, ɡɛ laa aa, mɛɛ chɔɡ heyaa, nomɛlbwa aa wola won lɛ heya.

²³ Nomɛlbwa kpɔ jam tɛ mɛ naa, dɛ sarahaa o ɛ tɛ mɛ la, onee dɛɛ duu mɛ. O kpɔɔ kwaa ŋwɛnɛ dɛɛ cheɡ, dɛ́ na ɡɛ men Korowii aa won nɛra lɛɛ.