Yela 5 - mzwDBL

Korowii nɔn kpɔe dɛ́ tɔ nɛn nɛɛ wesoŋa

Kooro Devid yel

¹ N Naa Korowii, cheɡ deŋne dɛ́ no n wesoŋa, dɛ́ no n hima maa dɛ hime nɔ.

² No n wii maa wia dɛɛ noe nɔ dɛ́ cha mɛ, henee n kooro ne Korowii maa dɛ tomɛ, henee mɛɛ soŋe.

³ N Naa Korowii, chɔɔ bɛlbwa he dɛ no n taa. Chɔɔbɔr n kpɔ n wesoŋa dɛɛ bil he sie, dɛɛ kpa ɡɛ haa chaŋ mɛ.

⁴ N Naa Korowii, he sie aa wechɔɡa ta lɛ, nyubinikpeɡ tena aa won ba he be.

⁵ Mbarafo tena aa won che he sie, he hah nɛra baa dɛ ɛ wechɔɡa.

⁶ He dɛ chɔɡ nɛra baa dɛ teŋe nyosone, he hah nɛra baa dɛ kpoo nɛra, ne nɛra baa dɛ neɡre nɛra.

⁷ Kɛ n te, he nyina haa dɛ nyin mɛ kohona nomanta, mɛɛ won ba he Dea dɛ́ ba ɡuŋi, dɛɛ tomɛ he Dea waa do ɡoroŋ ta ɔmee ne.

⁸ N Naa Korowii, n dɔma warɔ kɛrɛdɛ! Tɔ n sie ń ɛ anɔ la aa too he tea, ɡel n na he wa dɛɛ teŋɛ a ta.

⁹ Wobol aa le ba nyoo dɛɛ ba bwa ɛ nyosone, ba pɛla waa bwaa nɛra chɔɡa. Nɛra neɡra dɛ́ kpoo ba ɡboo lɔ ba nyu bini, nɛra ɡboo baa neɡre.

¹⁰ N Naa Korowii, pa ba bole dɛ́ tɛr ba deŋne, ɡel ba ɡbaɡba waa baa vɔrɔwa ɡure ba nyu ta. Doŋ ba le he sie, ba wechɔɡa kohona ne ba deŋnekpeɡ baa dɛ ɛɛ la wa.

¹¹ Gel nɛra baa chwaa baa marɛ sie lɛ, baa wonoo ɡo yela saŋ bɛlbwa ba sie lɛ. Kpɔ nɔn tɔ ba nɛ, ásɛ nɛra he wa aa lɔ ba bambile ta la sie lɛ.

¹² Kpela, Korowii he ɡelɔ nɛra ba wa aa toɡra na som. He nyina haa dɛ nyin ba la tɔ ba ɡbemɡbe, dɛ bar ba cheme.