Yela 49 - mzwDBL

Gɛnee dɛɛ hwɛɡɛ o kondɔɔh ta

Kora dea bii yel

¹ Nómɛlbwa no waa nɔ, nɛra haa lɔ harɛ nɔ ta bobɛlbwa,

² dansaara ne nɛnjena, dɔɔhna ne nyaara bwa.

³ Mɛɛ bol wejemwaa, á ɡel he liire bini chaah, hɛɛ no waa mun.

⁴ Mɛɛ cheɡ deŋnee dɛɛ no wobosɛɡla, dɛ́ kpɔ janjela lɔ dɛɛ baɡle a mun.

⁵ Dɛ wenaale balɔ, n dɔma bar mɛ cheme, kwaraa naa, maa ɔmɛ.

⁶ Nɛra baa kpɔ ba te dawɛ ba kondɔɔh ta koh a waa dɛɛ ɛ mbarafo aa, maa ɔmɛ.

⁷ Nomɛlbwa aa won lɛ o dɔŋ mkpa, kɛɛ dɛ́ kpɔ komɛl charɛ o nyu Korowii be.

⁸ Nɛwɛnyini mkpa yoɡ kpeɡri, komɛlbwa toole bá won kpɔ yawɔ,

⁹ ásɛ o won so le saŋ bɛlbwa dɛɛ la, waa wola sewɛ.

¹⁰ Nomɛlbwa nao kɛŋɔ wejerema dɛ sewɛ, ɡɛna ne banɔ la baa wola liire dɔe ɡe ɛɛ sewɛ, dɛ́ ɡel ba kondɔɔh tɛ bane.

¹¹ Ba lalbɔɔne ɛɛ ber ba deenee bá chɔ a bini, a lole kɛŋɔ dɛ ba fa dɔ harɛre, baa do belaa saŋ bɛlbwaa dɛɛ la.

¹² Nɛra dɔ kondɔɔh ɡɛ bɛlbwa kwaraa naa, aa won lɛɛ ba ba bɛ sewɛ, baa serewoo kɛ ola ken.

¹³ Waa aa chɔ le dɛ tɛ nɛra baa dɛ hwɛɡɛ ba ɡbaɡba nɛɛ, ne nɛra baa teŋɛ ba nɛɛ dɛɛ no waa baa dɛ bol ta laanee.

¹⁴ Baa na waa, dɛ́ serewe kɛ peera, seo tɔ ba sie dɛ́ kaa ba ne lalbɔɔne bini. Nɛra ba wa aa toɡra ɛɛ tiɡri ba nɛɛ, ba pɔh ba lalbɔɔne bini, ba ne ba deremi baah do jaŋne.

¹⁵ Kɛ Korowii ɛɛ lɛɛ mɛɛ, wɛɛ lɛɛ mɛɛ le kpeɡri seo aa dɔa la nyoa.

¹⁶ Dɛ nɛn dɔ kondɔɔh kohona naa, bɛ ɡel a we he nɛ, hale dɛ a nao dɛɛ dawɛ ɡɛ bɛlbwa kwaraa naa,

¹⁷ o baa sewaa, waa komɛlbwa ne kaala ba, waa won kpɔ a bɛlbwa kaa o be lalbɔɔ bini.

¹⁸ Gɛ saŋ waa soɡe le la, dɛ o dɛ lii o te nɛn waa na som, nɛra ɛɛ kpɛɛro a wa aa,

¹⁹ wɛɛ sewɔɔ ka pu o naawa, waa wola bɔr chaahnaa na kpa.

²⁰ Nɛn waa dɔ kondɔɔh waa wola waa mun no la, ɡɛ ola aa dɛ sewɛ laanee o ɡe ɛɛ ba sewa.