Yela 48 - mzwDBL

Korowii bwɛjen Saayɔn wa

Kora dea bii yel

¹ Korowii yaa dɛ tomɔ kan, a chɛ kɛ yá kpɛɛro o bwɛjen waa chɔŋɛ bwejen waa do ɡoroŋ la ta.

² Korowii Saayɔn Bwejen wer, dɛ do jaŋne kohona, koojen la bwɛjen kpɔ silɛɛ baa tɛ harɛ nɔ ta nɛra bwa.

³ Korowii lɔ o bwɛjen la ta, dɛɛ nyiŋi nɛra baa lɔ o ta nɛ.

⁴ Koranar boa ba laa tena nyoa, dɛɛ ba ba yo nɛra baa soɡe Saayɔn Bwejen ta,

⁵ kɛ baa ba bwɛjen la ta la, ba bwara yɔrɔ, ɔmee kohona ɡel ba chwa kaa.

⁶ Bochela laɡ ba bela, kɛŋɔ loltea aa lɔ haah ken,

⁷ kɛŋɔ peuchɔɡe aa taa le wee leebɔr dɛ lɔ stiimaere dɛɛ kaa la.

⁸ Ya no waa Korowii aa ɛa, dɛ ɡbaɡba naa siwi ne, Nemenɛ Korowii waa ɛ Korowii yaa dɛ tomɔ bwɛjen la ta. Wɛɛ kpɔ nɔnee tɔ o bwɛjen la taa saŋ bɛlbwa dɛɛ la.

⁹ N Naa Korowii, he nyina aa wola jaɡa dɔe ɡbo waa lɔ ya nyu bini, yaa lii he Dea bela.

¹⁰ N Naa Korowii, ɡɛ he sɔn aa kana la, ɡɛɛ nɛra ɛɛ kpɛɛre le harɛ jaɡa bwa, he kpeɡri kohona nomanta, he bol waa dɛɛ pa bole aŋwɛnɛ ta.

¹¹ Nɛra haa lɔ Saayɔn Bwejen doa, hé ɡel he sie lɛ. Juda harɛ bwɛjeɡre tena ɡe sie lɛ, kɛ haa dɛ pa bole aŋwɛnɛ ta.

¹² Hé valɛ bar Saayɔn, dɛ́ kure o dejaŋa,

¹³ hé nyiŋi o danjwɛɛre ne o danjwɛkpeɡa, dɛ́ dɔ waa bol baɡle he naanar baa ka ba,

¹⁴ dɛkalkɛ ɡɛ Korowii nɔɔ yaa tomɛ saŋ bɛlbwa, wɛɛ tɔ ya siee, dɛɛ baɡle ŋwɛnɛ yaa kpɔ o ta saŋ bɛlbwa dɛɛ la.