Yela 45 - mzwDBL

Kooro hanfale lawa yel

Kora dea bii yel

¹ Wobol aa wera su n nyoa, mɛɛ ba kpɔe ɡo yel tɛ kooro. N nyoa wobol do kɛŋɔ, kon nɛn waa jemɛ chwera kɛrɛdɛ, aa kpoŋa dɛɛ chwerɛ.

² Henee wera kohona, baala bwa bini, he nyoa jemɛ wobol ɡe, dɛkalkɛ Korowii sweere andɛɛɡa saŋ bɛlbwa dɛɛ la.

³ Banyoo, ir kpɔ he dɔmkon sɛɡle, he ɛ koojen, waa haa dɛ ɛ kan dɛ dɔ jirima.

⁴ Che kan haa doa ta ka yo, dɛ́ pɔ he dɔma nɛ, dɛ́ kpɔ kasinteŋ ne toɡra he wa aa toɡra, bol waa dɛɛ pa bole. He kpeɡri kohona ɛɛ ɡeloo hé pɔ he dɔma nɛ.

⁵ He hɛma nyɛɡre, dɛɛ jo he dɔma bambile bini, harɛre nɛra choɡli he sie.

⁶ He kora Korowii aa lea cheɡe, ɛɛ cheo saŋ bɛlbwa dɛɛ la, kasinteŋii hɛɛ ba kpɔe, dɛ́ nyiŋi he nɛra nɛ.

⁷ He dɛ nyin waa aa toɡra, dɛ ki wechɔɡa. A waa Korowii haa dɛ tomɔ lee cheɡ he bala koranar bwa bini, dɛ fuɡe noo do he nyu ta dɛ tɛɛ silɛɛ.

⁸ He laala sɔɔh tɔ konsɔɔhsoma bwa soo siwi, ba kpɔ bala nyena kwaa he kooderemi, yelɡoola kpɔ janjela lɔ yela, dɛɛ lɛ he sie.

⁹ Koranar bihaahna ja haahna baa dɔ jirima, dɛ do he dem nɛ, asɛ hanfale do kwaa baa kpɔ suuɡaswɛm tenten ɛa, dɛ che he diɡ pera.

¹⁰ Kooro hanfale, dɛɛ no waa maa dɛ ba bola nɔ, soh he nɛra ne he lolanar wa.

¹¹ He wer ɡelɔ kooro bambile do he nɛ, dɛɛ duuru, dɛkalkɛ he dɔɔree on.

¹² Bwɛjen Taaya tena ɛɛ ba koŋkɛɛla nee ba tɛɛ, suuɡa tena ɛɛ nyin bá kpɔ ba kwaa ba di he liire.

¹³ Kooro hanfale lɔ koodem, o wer dɔŋ toole, ba kpɔ suuɡaswɛm ŋwɛɛra sɔh ja ŋwɛɛra baa kpɔa sɔh o batakaarejaŋ la ta.

¹⁴ O do batakaarejaŋ ba sɔh kwaa dawɛ o ta, baa ba o ne hen kooro be, o toli teŋɛ o nɛ, baa ba ba ɡe ne he be.

¹⁵ Ba kpɔ silɛɛ dɛɛ ba, dɛ hɛɡre ba jo he koodem bela.

¹⁶ N naa kooro, hɛɛ lolɛ bibaalaa taeh, bá ba chiɡ he naawa naa ta ɛ koranar, ásɛ he ɡel baa nyiŋi harɛ la bwa ta.

¹⁷ N yel la ɛɛ ɡeloo hé dɔ sɔn kohona dɛɛ la, ásɛ harɛre nɛra kpɛɛre, saŋ bɛlbwa dɛɛ la.