Yela 44 - mzwDBL

Korowii nɔn kpɔe dɛ́ tɔ nɛn nɛɛ wesoŋa

Kora dea bii yel

¹ N Naa Korowii, ya noa deŋne ne, ya naawa bol wejena haa ɛa, ba bere saŋ la ya be.

² He kpeɡri nee he doŋi harɛre nɛra, dɛ kpɔ ya naawa ka so ba harɛ la ta. He chɔɡ ba, dɛ ɡel ya naawa wobɛlbwa do wer tɛɛ ba.

³ Ba tokobie ne laa ba yo lɛ harɛ la, kɛɛ ba ɡbaɡba bokpeɡa ne laa, he ɡbabir kpeɡri nee, dɛkalkɛ he baɡ ba nyoa ŋɔ, he ja ba nɛ, dɛɛ nyin ba.

⁴ Henee kooro ne Korowii maa dɛ tomɛ, dɛ ɡel he nɛra Israel tena yo, dɛɛ pɔ ya dɔma nɛ.

⁵ He kpeɡri taa a che, ya won pɔ ya dɔma nɛ, he sɔn taa ya che, dɛ tiɡri ba nɛ.

⁶ N to kɛɛ n tokobi, laa ɡela n won pɔ n dɔma nɛ.

⁷ Henee tɛ yaa kpeɡri, ya pɔ ya dɔma nɛ, dɛ ɡel sihiih kpo nɛra baa hah yaa.

⁸ N Naa Korowii, he nɛɛ yaa tamane tɔpere bɛlbwa, yaa kpɛɛre saŋ bɛlbwa dɛɛ la.

⁹ Kɛ taraken, he vɛh yaa dɛ ɡel ba pɔ ya nɛ, haa ya laa tena nɛɛ ja, dɛɛ la laa kpa.

¹⁰ He ɡelɔ ya chwa le ya dɔma sie, asɛ ba ba kam ya laala, kɛ laa ta kwa.

¹¹ He ɡelɔ ba kpoo yaa kɛŋɔ peera ken, dɛ lɔ yaa peɡre harɛre ta.

¹² He yoɡ yaa tɛ ya dɔma pɛɛpɛɛ, he ta komɛlbwa dɔe le a ta.

¹³ He ɡelɔ ya bala nyiŋi yaa dɛɛ vah, nɛra baa soɡa bar yaa dɛ mamɛ yaa.

¹⁴ Yanee harɛre tena bol waa dɛɛ yaɡɛ, ba nyiŋi yaa dɛɛ viiɡi nyuune.

¹⁵ Tɔpere bɛlbwaa mɛɛ di sihiih, sihiih ɡboo n bwa,

¹⁶ nɛra dɛ chɛɡ mɛ, dɛɛ muɡli n baah, dɛkalkɛ, n dɔma cheɡɛ ɡɛ ta, dɛɛ tɔ ba wel.

¹⁷ A lole kɛŋɔ anɔ bwa pu yaa, kɛ dɛ ya ta he waa soɛh, kɛɛ dɛ chɔɡ ya ne he fɔo yaa fɔwa la.

¹⁸ He waa ta lɔ ya bambile ta, ya ta waa haa do yaa a ta la vɛɛh,

¹⁹ kɛ he ɡel yaa tɛ kpɔɡ bini ola, biro tenten tɔ ya nɛ.

²⁰ Dɛ ya fe vɛh hen Korowii yaa dɛ tomɛ, dɛ kaa tomɛ harɛfala ta voɡa aa,

²¹ he fe nao, dɛkalkɛ, he jemɛ ya nyu bini liire aa sɔah bwa.

²² He nomanta, ya cheɡɛ seo nyoa saŋ bɛlbwa, baa ɛ yaa kɛ peera baa dɛ la ka kpoora ken.

²³ N Naa Korowii, ir nyu ne, ɛrɛɛ a do kɛŋɔ he chɔ dom nɔɔ? Gɔɔ he te, dɛ bɛ yaa vɛh kwaraa.

²⁴ Ɛrɛɛ he kpɔ sie sɔh yaa nɔɔ? Bɛ ya dɔma wenaale baa do yaa a ta la soh.

²⁵ Ya cholo chɔ bomboɡ ta, yaa wola won ir kpa.

²⁶ Ir nyu ne, dɛ́ ba cha yaa! Lɛ yaa he nyina aa wola jaɡa dɔe la wa.