Yela 42 - mzwDBL

Yela tɔn nɛɛte (Yela 42—72) Nɛn waa lɔ harɛfale ta wesoŋa

Kora dea bii yel

¹ N Naa Korowii, ɡɛ nyɔɡre kpo welo, o siwi yon swɛɛ, wɛɛ nyin nepale waa sɔna la, ɡɛɛ n siwi swɛɛ he wa.

² Korowii haa lole saŋ bɛlbwa, n dɛ nyini kɛ nyɔɡre aa dɛ kpo nɛn ken. Bɛweeree ń won ba he sie, dɛ́ ba tomɛ nɔ?

³ Sinii ber mɛ kondikwa, chɔɔ ne jwaana bwa. Saŋ bɛlbwaa n dɔma ɛɛ pɛɛ mɛ ŋɔ, “Leperaa Korowii haa dɛ tomɔ la dɔɔ?”

⁴ N lii n saŋ la aa, dɛ n bambile chɔɡɔ, n ne nɛnlaa bwa fa yon la hen Korowii Dea, ásɛ n tɔ ba sie ba teŋɛ, ba sie lɛ ba ɡo yela, dɛɛ hɛɡre dɛɛ kpɛɛre.

⁵ Ɛrɛɛ n tea bini chɔɡ ken? Ɛrɛɛ n liire bwa chɔɡ ken nɔɔ? N kpɔ n hwɛɡa bwa do hen Korowii nɛ, dɛ berɛ kwaa dɛɛ kpɛɛre ja. Henee ɛ n Lɛɛ,

⁶ ne Korowii maa dɛ tomɛ. N bambile chɔɡɔ kohona, anomanta, mɛɛ lii he waa, dɛ́ le Jɔɔdan Moo nyuune ta, ne Misar ne Hɛmɔn Bwejena dor.

⁷ He ɡelɔ bɔchuubu nee lɔ dɛɛ kpɔ n nɛ mɛɛ di suna, kɛŋɔ nɛn nee aa sua dɛ kpɔɔ kaa ken.

⁸ Korowii dɛ baɡle o nyina aa wola jaɡa dɔe n nɛɛ webaŋa, a ɡel n ɡo yel tɛo jwaana, dɛ soŋe Korowii waa ɡela n so le.

⁹ N ŋɔ Korowii waa do kɛ Bwetal n chwa kaa marɔ be ŋɔ, “Ɛrɛɛ he soh n waa nɔɔ? Ɛrɛɛ mɛɛ wi n dɔma, ba nyu bini aa kpeɡa nɔn ta nɔɔ?”

¹⁰ N hoɡa bwa dɛ wee mɛ, n dɔma aa dɛ muɡli n baah la wa, dɛɛ bɔɔ mɛ tɔpere bɛlbwa ŋɔ, “Leperaa Korowii haa dɛ tomɔ la dɔɔ?”

¹¹ Ɛrɛɛ tebinichɔɡ su n bwa ken? Ɛrɛɛ n bambile chɔɡ ken nɔɔ? N kpɔ n hwɛɡa bwa dawɛ hen Korowii nɛ, dɛ berɛ kwaa dɛɛ kpɛɛre ja, henee Korowii maa dɛ tomɛ, henee n Lɛɛ.