Yela 41 - mzwDBL

Weela ta chɔe wesoŋa

Kooro Devid yel

¹ Nɛra baa dɛ dawɛ nyaara waa la, ba na som, wenaale puu ba aa, Korowii lɛɛ ba dɛɛ le a nyoa.

² Korowii dɛ́ tɔ ba ɡbemɡbe, ásɛ ba soɡa bini do wer, o swee andɛɛɡa dɛɛ tɛɛ ba harɛ la ta, ba dɔma lii wechɔɡa tɛɛ ba aa, o kpɔ nɔn dɛɛ tɔ ba nɛ.

³ Korowii ɛɛ cha baa ba weela bini, dɛ́ ɡel ba berɛ dɔ bokpeɡa.

⁴ N ŋɔ, “N Naa Korowii, na n sum, chaah mɛ, dɛkalkɛ n ɛ wechɔɡa, dɛ jo he nɛ.”

⁵ N dɔma dɛ bol n bwara wechɔɡe ŋɔ, “Bɛweeree ó sewɛ ásɛ o sɔn he te nɔ?”

⁶ Nomɛlbwa na mɛ naa, nyosonee wɛɛ teŋe, liichɔɡa yon su o bambile, dɛ́ le kaa bola bobɛlbwa.

⁷ N dɔma pɛo dɛɛ ŋwal mɛ, ba lii wechɔɡa dɛɛ tɛ mɛ ŋɔ,

⁸ “Weechɔɡa lɔɔ bil, waa won ir le o chɔɔbɔr.”

⁹ Hale n dansom maa dɛ hwɛɡɛ o nɛ, nɛn n ne waa pɛ nɔn dɛɛ di kwaa la, ɛ n dɔm.

¹⁰ N Naa Korowii, na n sum, laɡ mɛ ir, ásɛ n bɔ n dɔma kem, waa baa ɛɛ mɛ la wa.

¹¹ N jemɔ kɛŋɔ he sie lɛ n nɛ, dɛkalkɛ n dɔma ta wone pɔ n nɛ.

¹² N waa toɡrɔ nomanta, hɛɛ laɡ mɛɛ do he sie, saŋ bɛlbwa dɛɛ la.

¹³ Korowii Israel tena aa dɛ tomɔ laanee dɔ jam, le saŋ waa wola jaɡa dɔe dɛɛ la. Aamen!