Yela 40 - mzwDBL

Kpɛɛra yel

Kooro Devid yel

¹ N wio no Korowii, dɛ lawɛ bambile dɛɛ kpao, asɛ o na n sum, dɛ no n wii.

² O laɡ mɛ le lalabwɛ waa do kɛŋɔ bɔluŋ ta, n le seo nyoa. O kpɔ mɛ ba chɔŋɛ bwetal ta, n bwara sɔɔh mɛ, asɛ n che kiŋkiŋ.

³ O kpɔ yelfale do n nyoa, kpɛɛra yel waa dɛ baɡle kɛŋɔ, Korowii yaa dɛ tomɔ la kan. Nɛra ɡalɡa ɛɛ na waa waa ɛa, dɛ́ kpɔ ba te dawɛ o nɛ.

⁴ Nɛra baa kpɔ ba te dawɛ Korowii nɛɛ la, ba na som. Nɛra baa wola mbarafo tena we-ɛɛla nyiŋi, kɛɛ baa wola voɡa tomɛ la.

⁵ N Naa Korowii yaa dɛ tomɛ, nyokpowe-ɛɛla haa ɛa la warɔ ɡa. Yaa won baɡle wejena haa vɔrɔwa bil tɛ yaa la, a warɔ kohona, yaa wola won kura.

⁶ Konaatena ne koŋkwaa baa kpɔa ɛ sarahare dɛɛ tɛɛ la, he sie aa a ta lɛ, he tɛ mɛ deŋne ŋɔ, n kpɔ no he wa. He siwi aa konaatena baa dɛ fuah ambire dɛɛ tɛɛ, ne sarahare baa ɛa, dɛ kpɔ dɛɛ soŋe nɛra wechɔɡa la su.

⁷ Belaa n ŋɔ, “N Naa Korowii, menee la. N balɔ. Ba chwerɛ n waa do he Mmara tɔn la bini.

⁸ N Naa Korowii, na ɡɛ maa dɛ nyin he waa ɛɛ, n kpɔ he webaɡla la do n bambile bini.”

⁹ He nɛra baa cheme warɛ aa, n dɛ bol amanesoma aa dɛ ba mkpa ne, maa n nyoa tɔ. N Naa Korowii, he ɡbabir jemɔ kɛ maa a bolaa ɡel.

¹⁰ Maa amanesoma aa dɛ lɛ nɛra la kpɔe dɛɛ sɔh n bambile bini, n dɛ bol he kasinteŋ ne he chae waa la. He nɛra chemo warɛ aa, maa nyoa tɔ, he waa aa ɛ kasinteŋ, ne he nyina aa wola jaɡa dɔe la ta.

¹¹ N Naa Korowii, n jemɔ kɛ haa n sum nae ɡel bwa, he nyina ne kasinteŋ ɛɛ tɔ mɛ ɡbemɡbee saŋ bɛlbwa.

Chae wesoŋa

¹² N dɔma baa wola nyoa dɔe bar mɛ cheme, n wechɔɡa ɡwaa n nɛ, maa jemɛ bela maa kpɔ. A warɔ ɡwaa n nyumpona kwara, a ɡel n hwɛɡa bwa ta.

¹³ N Naa Korowii, n dɛ soŋe, lɛɛ mɛ, ba warane, dɛ́ ba cha mɛ.

¹⁴ Gel nɛra baa dɛ nyin mɛ dɛ́ kpo la, sihiih kpo ba, bá wili. Nɛra ba sie aa dɛ lɛ n wenaale ta la, ber ba kaa, dɛ́ ɡel sihiih kpo ba.

¹⁵ N Naa Korowii, ɡel banɔ la baa dɛ mam mɛ la bambile chɔɡ, pɔe haa pɔ ba nɛɛ la wa.

¹⁶ Nɛra baa laŋa kaa tomɛ la, ɡel bá dɔ silɛɛ dɛɛ hɛɡre. Gel nɛra haa lɛɛ ba ba dɔ mkpa la ɛɛ ŋɔ, “Hé na ɡɛ Korowii aa kana!”

¹⁷ N nyao, dɛ ɛ nɛŋɡwɛɡre, kɛ he ta n waa soɛh. Henee Korowii maa dɛ tomɛ, henee ɛ n Lɛɛ, n poori, ba warane, dɛ́ ba cha mɛ.