Yela 39 - mzwDBL

Nɛn o bwara aa dɛ nyɛɡ wechɔɡa bola

Kooro Devid yel

¹ N lii n nyu bini ŋɔ, “Mɛɛ nyiŋi n ŋwɛnɛre ta kɛrɛdɛɛ, maa ɡel a che n nyoa wobol ta, n ɛ wechɔɡa. Nɛnchɔɡa bɛn mɛ naa, maa wobɛlbwaa bol.”

² Kɛ n fa aa tɔ nyoa maa wola wobɛlbwa bolɛ, n ta wedɛɛɡe bɛlbwa ɡe bolɛ la, a taa n bonyɛɡa ɡwaa n nɛɛ kohona.

³ N bambile chɔɡɔ kohona, maa ŋɔ ń kpɔ liire la, name tenee a yon ɡwaa, asɛ n ŋɔ,

⁴ “N Naa Korowii, chaɡ mɛ saŋ maa so ka tel, ne n tɔpera aa ka n sie. Aa biɡri dɛ n sewɔ.

⁵ He ɡelɔ me mkpa do bori, a ta komɛlbwa ɛɛ he siwi ta, nɛwɛnyini bɛlbwa mkpa do kɛŋɔ peu he be.

⁶ Nɛwɛnyini mkpa do kɛŋɔ lileo, ba wobɛlbwa ɛ wepuu. Wɛɛ nyin kondɔɔh cheɡ kohona, kɛ waa jemɛ naate aa ba ɛ o kwa.

⁷ N Naa Korowii, bɔkwaa mɛɛ nyin taraken jaɔ? N hwɛɡa bwa lɔ he nɛ.

⁸ Lɛɛ mɛ le n wechɔɡa bwa ta, bɛ ɡel nɛra baa ɡɛna dɔɔ mɛ, dɛ́ mam mɛ.

⁹ N tɔ nyoa name, maa wobɛlbwaa bol kpa, henee ɛɛ mɛ ɡɛ.

¹⁰ Bɛ n deŋne tɛr kpa! He deŋnetɛra la ɡwaa n nɛ.

¹¹ He bol wa bandia ne, dɛ kpɔ dɛɛ tɛr ya deŋne, ya wechɔɡa wa, ɡɛ dudul yon di kon dɛ chɔɡo la, ɡɛɛ he chɔɡ ya kondɔɔh, nɛwɛnyini bɛlbwa do kɛŋɔ peu ken.

¹² N Naa Korowii, no n wesoŋa, no n wii dɛ́ cha mɛ, bɛ he deŋna laa kpɔ n be. N do kɛŋɔ hɔɔh harɛ nɔ ta he sie, kɛŋɔ ya naawa bwa fa aa ɛa la.

¹³ Laa sie kpɔ n nɛ, ásɛ n sie berɛ lɛ ja, mɔɔ n sewɛ le harɛ nɔ ta.”