Yela 38 - mzwDBL

Bonyɛɡa wesoŋa

Kooro Devid yel

¹ N Naa Korowii, bɛ ɡel he baah di he pwaah mɛ, bɛ ɡel he baah di kohona, he tɛr n deŋne.

² He ta he hɛma yaɡ mɛ, dɛ lɔ mɛ bil.

³ He bandia ɡelɔ n bwara ɛɛ nyɛɡ mɛ, n wechɔɡa nomanta, n bwadabii bwa ne weelaa.

⁴ N wechɔɡa ɡwaa n nɛɛ kohona, a do kɛ bontɔɡa maa wola won che.

⁵ N wechɔɡa aa ɡela n ɡɛn nomanta, n ŋwɛra pɔɔh, dɛ do sɔɔh.

⁶ N weweele ɡwaa n nɛ, a ɡel maa won che, dɛɛ wi tɔpebir bwa kɛŋɔ, nɛn waa dɛ ɛ lwe ken.

⁷ N nyaŋ dɛ nyaa mɛ, dɛɛ wee mɛ, n bokpeɡa tonɛ.

⁸ N ɡwɛɡrɔ, n bwara bini bwa sɔɔh, suna dii ɡel mɛɛ pɛmɛ.

⁹ N Naa Korowii, he ɡbabir jemɛ n waa bwa aa chɔ he sie, he dɛ no n pɛma maa dɛ pɛmɛ bwa.

¹⁰ N bambile dɛ lɔ, n bokpeɡa tonɛ, n sibie ɡe aa na kɛrɛdɛ kpa.

¹¹ N daamanar ne n soma bwa chwa mɛ n ŋwɛra wa, hale n lolanar bwa ɡe chwa mɛ.

¹² Nɛra baa dɛ nyin mɛ dɛ́ kpo, haɡre mɛ bela, nɛra baa dɛ nyin n chɔɡa dɛ́ aah mɛ, tɔpere bɛlbwaa baa vɔrɔwe n vɔrɔwa, dɛ́ chɔɡ mɛ.

¹³ N do kɛ nɛn o deŋne aa wola waa no, kɛŋɔ amumu maa wola won bol wa.

¹⁴ N do kɛ nɛn waa wola waa no, ba bol wa waa wola won chaŋe la ken.

¹⁵ Kɛ N Naa Korowii, he nɛɛ mɛɛ hwɛɡɛ, henee dɛ́ chaŋ mɛ.

¹⁶ Bɛ ɡel n dɔma mam mɛ n wenaale wa, bɛ ɡel n chola ɛɛ ba silɛɛ.

¹⁷ N dɛ ba chola, wee n bwara aa dɛ wee mɛ tɔpere bɛlbwa wa.

¹⁸ N dɛ bol n wechɔɡa, a ɡelɔ mɛɛ ɔmɛ kwara.

¹⁹ N dɔma warɔ, dɛ do kpeɡri, ba warɔ, dɛ hah mɛ pɛɛpɛɛ.

²⁰ Nɛra baa kpɔ wechɔɡa dɛɛ bɔ wedɛɛɡa kem cheɡɛ n nɛ, dɛkalkɛ n dɛ ɛ waa aa toɡra.

²¹ N Naa Korowii, bɛ habɔɔ berɛ kpo mɛ, Korowii maa dɛ tomɛ, bɛ bojaŋ kaa ɡel mɛ.

²² N Naa Korowii, henee ɛ n Lɛɛ, ba warane, dɛ́ ba cha mɛ.