Yela 37 - mzwDBL

Korowii nɛɛ hwɛɡa

Kooro Devid yel

¹ He bɛ ɡel nyubinikpeɡ tena we-ɛɛla we he nɛ, he bɛ wechɔɡ-ɛɛra bwara we.

² Baa biɡri hol kɛŋɔ kpɔɡa ken, dɛ́ piɡri serewe kɛŋɔ, kpɔɡlwɛɛ yon hol la.

³ Hé kpɔ he te dawɛ Korowii nɛ, dɛɛ ɛ wedɛɛɡa, ásɛ dɛ so harɛ la ta deŋnesɔɔhna ne.

⁴ Hé ɡel he sie ɛɛ lɛ Korowii nɛ, ásɛ o tɛ heya he bambile konnyina.

⁵ Hé kpɔ he waa bwa do Korowii nɔn ta, hé kpɔ he te dawɛ o nɛ, ásɛ o cha heya.

⁶ Wɛɛ che toɡra he wa aa toɡra taa, ásɛ he kasinteŋ dii do kɛ nii, dɛɛ chaah kɛŋɔ webaŋa ken.

⁷ Hé lawɛ bambile, dɛɛ kpa Korowii, dɛ nyubinikpeɡ tena waa wer dɛɛ tɛɛ ba aa, he bɛ ɡel a we he nɛ kɛŋɔ aa chiɡ ba kɛrɛdɛɛ.

⁸ Hé laa he te kpɔ tebinichɔɡ ne bandia ta, wechɔɡa ɡbo taa aa kaa nɛn ne.

⁹ Nɛra baa dɔ hwɛɡa Korowii nɛɛ la ɛɛ dɔ harɛɛ dɛ́ so o ta, kɛ nyubinikpeɡ tena te, baa doŋ ba le o ta.

¹⁰ Aa biɡri dɛ nyubinikpeɡ tena toole kpa, hɛ́ɛ baa nyin ba bɔree, kɛ háa ban na.

¹¹ Nɛra baa pwɛr ba te la, ɛɛ so harɛ la taa, dɛ́ dɔ deŋnesɔɔhna kohona.

¹² Nyubinikpeɡ tena dɛ vɔrɔwe nɛra ba wa aa toɡra vɔrɔwa, dɛɛ nyiŋ ba sichɔɡa ne.

¹³ Korowii dɛ mamɛ nyubinikpeɡ tena, o jemɔ kɛŋɔ ba chɔɡa tɔpere telo tonɛ.

¹⁴ Nyubinikpeɡ tena kpɔ ba tokobie, dɛ harɛ ba tori kpa. Ba dɛ nyin bá kpoo nyaara ne nɛŋɡwɛɡra, dɛ́ kpoo nɛra ba wa aa toɡra,

¹⁵ kɛ ba ɡbabir tokobie dɛ́ kpoo ba, ba tori kuuɡi.

¹⁶ Ŋwɛnɛdɛɛɡe ta cheɡa dɛ́ dɔ konjeɡa wer dɛ ɡwaa, kɛ haa cheɡɛ ŋwɛnɛchɔɡe ta dɔa kohona,

¹⁷ dɛkalkɛ, Korowii ɛɛ sɔɔh nyubinikpeɡ tena nyoa, dɛ́ kpɔ nɔn tɔ nɛra ba wa aa toɡra nɛ.

¹⁸ Korowii jemɛ nɛra wechɔɡa aa wola toole ba nɛɛ wa, baa dɔ harɛ laanee ó ɛ ba kapɛrɛ kon, saŋ bɛlbwa dɛɛ la.

¹⁹ Baa wahalaa na sibeɡra saŋ, lɔr saŋ kwaraa yaa, dɛ ba te dɔ kondikwa.

²⁰ Nyubinikpeɡ tena ɛɛ serewoo, nɛra baa ɛ Korowii dɔm la do kɛŋɔ kpɔɡa aa wola biɡri la ken, baa nyoɡroo kɛŋɔ ninchuu ken.

²¹ Nyubinikpeɡ tena kemɛ kon aa, ba dɛ vɛh bɔe, kɛ nɛra ba wa aa toɡra te aa nɛra kwaa tɛɛ ɡel bwa.

²² Nɛra Korowii aa swee ba andɛɛɡa la, ɛɛ dɔ harɛ laanee, kɛ banɔ la waa taah ba la te, wɛɛ doŋ baa le o ta.

²³ Korowii sie lɛ nɛra we-ɛɛla ta naa, o dɛ baɡ ba ŋwɛnɛ baa kpɔ o ta, dɛ kpɔ nɔn dɛɛ tɔ ba nɛ.

²⁴ Ba lɔ naa kwaraa naa, baa chole, dɛkalkɛ o laɡ ba kpoŋe.

²⁵ N fa ɛ bechala, dɛ ba ɛ banjena, kɛ n ta nae kɛŋɔ Korowii laa nɔn kpɔ nɛra ba wa aa toɡra nɛ, kɛɛ ba bii valɛ dɛɛ soŋe kondikwa.

²⁶ Ba won kwaa kɛɛ, dɛɛ kemɛ ba bala ja, ba bii ɛɛ dɔ andɛɛɡa.

²⁷ Hé ɡel wechɔɡa ɛɛ dɛ́ɛ ɛ wedɛɛɡa, ásɛ he so harɛ la ta saŋ bɛlbwa dɛ́ɛ la.

²⁸ Waa aa wera dɛ toɡre laanee Korowii ɛɛ nyin, waa nɛra ba wa aa dɔ kasinteŋ laanee ɡel. Korowii ɛɛ kpɔ nɔnee tɔ ba nɛ, saŋ bɛlbwa dɛɛ la, kɛ nyubinikpeɡ tena naanar te, wɛɛ doŋ baa le harɛ la ta.

²⁹ Nɛra ba wa aa toɡra la, banee dɛ́ dɔ harɛ la ta so, saŋ bɛlbwa dɛɛ la.

³⁰ Nɛra ba wa aa toɡra nyoa wejemwaa do, ba nyoa waa aa wera ne kasinteŋ do.

³¹ Korowii baa dɛ tomɔ Mmara lɔ ba bambile bini, baa an kpɔe dɛɛ ta bwa.

³² Nyubinikpeɡ tena dɛ kpaah nɛra ba wa aa toɡra, dɛɛ nyin ba dɛ́ kpoo,

³³ kɛ Korowii aa ɡel ba di kpeɡri ba nɛ, kɛɛ ba di bolchɔɡe, ɡɛ saŋ wa aa puu ba la.

³⁴ Hɛ́ɛ hwɛɡɛ Korowii nɛ, dɛ́ɛ teŋɛ o Mmarare ta. Wɛɛ ɡeloo hé dɔ harɛ la ta so, dɛ́ doŋi nyubinikpeɡ tena la he siwi ta.

³⁵ N na nyubinikpeɡ te waa wola nɛn nɛɛ sune, o soɡa bini do wer kɛŋɔ, daa waa kpeɡa harɛdɛɛɡe ta ken,

³⁶ kɛ a ta biɡre bɛlbwa, o den sewɛ, n ɡaaɡe o bɔr, n ta on nae.

³⁷ Hé nyiŋi nɛra ba wa aa toɡra na, ba dɔ deŋnesɔɔhna ba kerekere soɡa bini.

³⁸ Kɛ wechɔɡ-ɛɛra bwa ɛɛ serewoo, ba naanar aa kae ba harɛ nɔ ta.

³⁹ Korowii dɛ lɛ nɛra ba wa aa toɡra, dɛɛ lɛɛ ba ba wenaale ta.

⁴⁰ O kpɔ nɔn dɛɛ tɔ ba nɛ, dɛɛ lɛɛ ba, o lɛɛ ba dɛɛ le nyubinikpeɡ tena nɔn ta, dɛkalkɛ, onee ba chwa kaa marɛ.