Yela 36 - mzwDBL

Nɛwɛnyina nyubinikpeɡ wa

Kooro Devid yel

¹ Korowii waa lɔ n bambile bini, dɛɛ baɡle nyubinikpeɡ tena wechɔɡa wa. Baa Korowii ɔmɛ, á ba ɛ kɛŋɔ baa duuruu.

² Ba dɛ lii ba nyu bini kɛŋɔ ba ɛ nɛnjena nomanta, Korowii aa ba wechɔɡa baa dɛ ɛ la nae ba, dɛ́ pa ba bolchɔɡe.

³ Nyubinikpeɡ ne nyosone waa baa bol, ba ta wedɛɛɡa liire dɔe kpa.

⁴ Ba chɔ ba chɔɔbɔra kwaraa naa, baa wobɛlbwa aa wera ɛ, baa wechɔɡa bɛlbwa ɡe vɛh.

⁵ N Naa Korowii, he nyina aa wola jaɡa dɔe ɡwaa komɛlbwa, he kasinteŋ waa ɡe ta jaɡa dɔe.

⁶ He wa aa toɡra la jaŋne kaa nyundua kɛ bwejena tenten ken, he bole pae bini do luŋri kɛŋɔ mpo vil, dɛɛ nyiŋi nɛwɛnyina ne ola bwa nɛ.

⁷ Na ɡɛ he nyina aa wola jaɡa dɔe aa wera! He kena lɔɡree ya chwa baa sɔh, kɛŋɔ jal yon lawɛ o bii, do o kena lɔɡre la.

⁸ He tɛ yaa kondikwa a warɛ yaa di he dem, dɛ tɛ yaa he wedɛɛɡa, a do kɛ nee waa dɛ palɛ yaa nyɔ.

⁹ He nɛɛ ya che dɛɛ dɔ mkpa, he nii laanee ɡela bɔr chaah yaa na.

¹⁰ Teŋɛ dɛɛ nyin nɛra baa dɛ teŋɛ he waa ta, dɛ́ɛ ɛ nɛra ba wa aa toɡra andɛɛɡa.

¹¹ Bɛ ɡel mbarafo tena ba yoo mɛ, kɛɛ nyubinikpeɡ tena la doŋ mɛ.

¹² Na ɡɛ wechɔɡ-ɛɛra aa chola, ba taɡ ba ta, baa wola won ir kpa.