Yela 35 - mzwDBL

Chae wesoŋa

Kooro Devid yel

¹ N Naa Korowii, kpɔ nɛra baa ɛ n dɔma la ɛ he dɔma, ka yo nɛra baa dɛ yoo mɛ la.

² Kpɔ he dɔmkwa tɔ mɛ ɡbemɡbe, ásɛ dɛ lɛɛ mɛ.

³ Kpɔ he lampea ne kpanfɛ, dɛ́ yo nɛra baa dɛ ti mɛ la. Baɡɛ nyoa kɛŋɔ, hɛɛ lɛɛ mɛɛ.

⁴ Gel sihiih kpo nɛra baa dɛ nyin mɛ dɛ́ kpo. Nɛra baa dɛ vɔrɔwe n vɔrɔwa la, ɡel ba wili, dɛ́ berɛ kaa.

⁵ Gel ba do kɛŋɔ haahra peu aa taa dɛɛ kaa a ne la ken, Korowii nyundua torome teŋɛ ba nɛ dɛ́ɛ kaa.

⁶ Gel biro ba tɔ ba ŋwɛnɛ ta o do vɔle, Korowii nyundua torome la teŋɛ ba nɛ.

⁷ N ta ban wobɛlbwa ɛɛ ba har mɛ bel, dɛ forɛ bɔluŋ, dɛ́ laɡ mɛ.

⁸ Gel ba ne jara, dɛ wenaale ba ba nɛ, dɛ́ ɡel ba ɡbaɡba bel la laɡ ba, ba lee bɔluŋ la bini dɛ́ serewe.

⁹ Ásɛ Korowii nomanta, n sie lɛ, dɛɛ hɛɡre, o lɛɛ waa lɛɛ mɛ la wa.

¹⁰ Mɛɛ le n bambile bini bwaa dɛ ŋɔ, “N Naa Korowii, umee do kɛ hen ɔ? He lɛ nɛŋɡwɛɡra dɛɛ le nɛŋkpeɡa nɔn ta, dɛ lɛ nyaara dɛɛ le nɛra baa dɛ fiɡ ba nɔn ta.”

¹¹ Nɛnchɔɡa teŋe nyosone dɛɛ dawɛ n nɛ, waa maa wola a waa jemɛ laanee baa bɔɔ mɛ.

¹² Wechɔɡaa ba kpɔ dɛɛ bɔ mɛ wedɛɛɡa kem, a ɡel n sie aa lɛ, n bambile chɔɡ.

¹³ Ba bwara fa aa dɛ wee ba la, lweyalee n kpɔ tɔ, n vɔwɛ nyoa, n ta kwaa dii. N ba harɛ, dɛ soŋe Korowii tɛɛ ba kɛrɛdɛ,

¹⁴ ɡɛ n fe aa soŋe tɛ n dam kɛɛ n nime. N bambile chɔɡɔ mɛɛ wi, kɛŋɔ maa dɛ wi n nya seo waa ken.

¹⁵ Kɛ wenaale aa puu mɛ la, ba sie lɛo, dɛ ba bar mɛ cheme, dɛɛ di n loro. Ba teŋɔ do mɛ hɔhɔrɔwa kohona, baa wola n nɛɛ sune.

¹⁶ Ba do kɛ nɛra baa wola Korowii tomɛ, dɛ cheme dɛɛ mam mɛ, dɛɛ nyiŋ mɛ sichɔɡa ne.

¹⁷ N Naa Korowii, saŋ besoo hɛɛ ba ɡɛ waa nɔ nyiŋa ka tel ɔ? Lɛɛ mɛ le yoi baa dɛ yoo mɛ nɔ ta, lɛɛ mɛ le n dɔma baa do kɛ nyujentena nɔ nɔn ta.

¹⁸ Ásɛ n kpɔ jam tɛɛ he nɛndamanta baa chema bini, nɛnlaa baahnee mɛɛ ba he kpɛɛra.

¹⁹ Bɛ ɡel nɛra baa hah mɛ pɛɛpɛɛ la di n loro, bɛ ɡel ba sie lɛ, n suna maa dɛ di nɔ ta.

²⁰ Baa waa aa ba deŋnesɔɔhna ne bol, nyosonee ba teŋe dɛɛ dawɛ, nɛra baa wola ba bwara ne waa nyin nɛ.

²¹ Ba dɛ pwaah mɛ ŋɔ, “Ya na waa bwa haa ɛa.”

²² N Naa Korowii, he na ɡɛ waa nɔ, bɛ nyoa tɔ. Bɛ bojaŋ kaa ɡel mɛ.

²³ Korowii maa dɛ tomɛ, ir nyu ne, dɛ́ yo tɛ mɛ.

²⁴ N Naa Korowii, che toɡra he wa aa toɡra ta, dɛ́ pa mɛ boldɛɛɡe, bɛ ɡel n dɔma mam mɛ.

²⁵ Bɛ ɡel ba lii ŋɔ, “Ya dɔɔ ɡɛ yaa dɛ nyin name!” Kɛɛ dɛ ŋɔ, “Ya dɔɔ kɛrɛdɛ.”

²⁶ N Naa Korowii, ɡel sihiih kpo nɛra baa dɛ mam mɛ kohona, ásɛ dɛ wili, n wahala maa dɛ na wa. Gel sihiih kpo nɛra baa dɛ lii kɛ ba ɡwaa mɛ kohona.

²⁷ N Naa Korowii, ɡel banɔ la baa dɛ nyin n di boldɛɛɡe, ɛɛ do lɔŋɔre silɛɛ ne. Ásɛ baa bol ŋɔ, “Korowii kan ɡa, o sie lɛ o bonɔɔ wer waa doa ta.”

²⁸ Belaa mɛɛ ba toɡra he wa aa toɡra la waa bola, dɛ́ kpɛɛre tɔpebir bwa.