Yela 34 - mzwDBL

Korowii duura

Kooro Devid yel

¹ Mɛɛ kpɛɛ Korowii saŋ bɛlbwaa. Maa o jaamaa ɡel bwa.

² Mɛɛ kpɛɛro n bambile bwa nee, ɡel nɛra baa dɛ fiɡ ba no, ba sie lɛ.

³ Hé ɡel n ne he bwa kpɔ jirima tɛ Korowii, yá ɡɔɔ o sɔn.

⁴ N soŋe Korowii, asɛ o chaŋ mɛ, dɛ lɛɛ mɛ le ɔmewa bɛlbwa ta.

⁵ Nɛra baa kpɔ ba te dawɛ o nɛɛ sie dɛ lɛ, sihiih aa ban kpo bwa.

⁶ Nɛŋɡwɛɡra wio no Korowii, o no ba be, dɛ lɛɛ ba le ba wenaale bwa ta.

⁷ Korowii nyundua torome dɛ daah nɛra baa dɛ tomɛ Korowii, dɛɛ lɛɛ ba.

⁸ Hé daɡɛ Korowii waa la, dɛ́ na kɛ o wer, nɛra baa chwaa kaa marɔ la, ba na som.

⁹ Korowii nɛra he wa aa toɡra, hɛ́ɛ duuru, dɛkalkɛ nɛra baa dɛ teŋɛ o waa ta la, ba dɛ dɔ komɛlbwa baa dɛ nyin.

¹⁰ Lɔr ɛɛ won kpo nyujentena a ɡwɛɡre, kɛ banɔ la baa dɛ no Korowii be la, kondɛɛɡa aa ban paŋɛ.

¹¹ N bii, hé ba dɛ́ ba cheɡ deŋne no n be, mɛɛ baɡle heyaa ɡɛ haa kpɔ duure tɛ Korowii.

¹² Nomɛlbwa waa dɛ nyin mkpajaŋ, dɛɛ nyin kɛ o bwara sɔɔhno la,

¹³ wɛ́ɛ nyiŋi o nyoa kɛrɛdɛ. O bɛ wobochɔɡa dɛɛ bol, o bɛ nyosone dɛɛ teŋe.

¹⁴ Wɛ́ɛ ke o te wechɔɡa ta, dɛ́ɛ ɛ wedɛɛɡa. Ó swɛɛ siwi dɛ́ɛ ɛ waa aa dɛ ba nyopɛo ne.

¹⁵ Nɛra ba wa aa toɡra dɛɛ su Korowii siwi la, Korowii dɛ nyiŋ ba, dɛɛ no ba wesoŋa.

¹⁶ Kɛ wechɔɡ-ɛɛra te, o kii ba, ba sewaa, baa ba waa lii kpa.

¹⁷ Nɛra ba wa aa toɡra wio no Korowii aa, o dɛ no, dɛ lɛɛ ba dɛɛ le ba wahala bwa ta.

¹⁸ Korowii dɛ bɛne banɔ la ba bambile aa chɔɡa, dɛɛ lɛ banɔ la baa wola hwɛɡa bɛlbwa dɔe.

¹⁹ Nɛra ba wa aa toɡra ɛɛ won na wahala kohona, kɛ Korowii lɛɛ ba dɛɛ le a bwa ta,

²⁰ Korowii dɛ nyiŋi ba nɛɛ kɛrɛdɛ, ba hoɡ beŋkpoŋ kwara aa ku.

²¹ Nyubinikpeɡ tena wechɔɡa baa dɛ ɛ laanee dɛɛ kpoo ba, nɛra baa hah nɛra ba wa aa toɡra ɡe ɛɛ dɔ deŋnetɛra.

²² Korowii ɛɛ lɛ o nɛraa, wɛɛ lɛ banɔ la baa chwaa kaa marɔ laanee.