Yela 32 - mzwDBL

Wechɔɡa bola ne a kpɔe dɛ́ kɛ

Kooro Devid yel

¹ Nɛra Korowii aa kpɔ ba wechɔɡa kɛ ba, waa wola a waa lii kpa la, ba na som.

² Nɛn Korowii aa wola o wechɔɡa waa lii kpa, nyosone bɛlbwa aa wola toole o bini la, o na som.

³ N fa aa wola n wechɔɡa maa ɛa bolɛ la, n wio tɔpebir bwa, dɛ ba koh.

⁴ N Naa Korowii, chɔɔ ne jwaana bwaa he tɛr n deŋne, asɛ n bokpeɡa bwa tonɛ, kɛŋɔ wee yon lɔ bobɛlbwa hol hwel saŋ la.

⁵ Asɛ n bol n wechɔɡa baɡle, n ta kpɔe sɔeh. N liiro kɛ mɛɛ boloo baɡle, ásɛ he kpɔ a bwa kɛ mɛ.

⁶ Anomanta, ɡel nɛra baa dɛ tomɛ ɛɛ soŋe ba wahala nae saŋ, ásɛ dɛ wenaale do kɛŋɔ nee waa sua dɛɛ ba naa, o bɛ won tel ba be.

⁷ He bee n chwa baa sɔh, hɛɛ lɛɛ mɛɛ le sibeɡra ta. Mɛɛ ɡo yelaa kpɛɛre, lɛɛ haa lɛɛ mɛ la wa.

⁸ Korowii ŋɔ, “Mɛɛ baɡle ŋwɛnɛ aa chɛ kɛ he kpɔ o ta, mɛɛ bol waa baɡle, dɛ́ kpɔ n nɔn tɔ he nɛ.

⁹ Bɛ ɡɛn kɛŋɔ jaaɡɔ kɛɛ keeɡo, ba yon kpɔ kabaɡrare do o nyoa, mɔɔ o jemɛ waa o dɔɔ aa dɛ nyin kɛ o ɛ la.”

¹⁰ Nyubinikpeɡ tena wenaale warɔ taeh, kɛ Korowii nyina aa wola jaɡa dɔe la, dɛ tɔ nɛn waa dɛ yaradao la nɛ.

¹¹ He nɛra he wa aa toɡra, hé ɡel he sie lɛ hɛɛ hɛɡre, waa Korowii aa ɛa la wa. Nɛra haa dɛ teŋɛ o waa ta la, hé do lɔŋɔre silɛɛ ne.