Yela 31 - mzwDBL

Korowii yaradae wesoŋa

Kooro Devid yel

¹ N Naa Korowii, henee n chwa baa marɛ, bɛ ɡel n di sihiih, che toɡra he wa aa toɡra ta, dɛ́ lɛɛ mɛ.

² Cheɡ deŋne, dɛ́ no n be, dɛ́ ba lɛɛ mɛ warane. Do kɛŋɔ Bwetal, ń chwa ba marɛ, ɛ danjwɛkpeɡ dɛ́ lɛɛ mɛ.

³ Haa do kɛŋɔ n Bwetal n chwa baa marɛ ne danjwɛkpeɡ nɔ, ba tɔ n sie, dɛ́ baɡ mɛ ŋwɛnɛ, he sɔn la wa.

⁴ N dɔma har mɛ bela, lɛɛ mɛ le a ta, dɛkalkɛ henee n chwa baa marɛ.

⁵ He nɔn taa n kpɔ n lileo do, N Naa Korowii, he waa dɔ kasinteŋ, lɛɛ mɛ.

⁶ N hah nɛra baa kpɔ ba te dawɛ voɡa aa wola tɔnɔ bɛlbwa dɔe nɛ, kɛ hen Korowiirii mɛɛ yarada.

⁷ N sie ɛɛ lɛo dɛ́ hɛɡre, nyina haa dɛ nyin mɛ la wa, dɛkalkɛ he na n wahala, dɛ jemɛ n weweele.

⁸ He ta ɡelɛ n dɔma dɔɔ mɛ, he kpɔ n naa cheɡ bodɛɛɡe.

⁹ N Naa Korowii, na n sum, dɛkalkɛ n dɛ na wahala kohona, wii kohona ɡelɔ maa na kɛrɛdɛ, n bwadabii bwa ɡwɛɡre.

¹⁰ Suna dii ɡelɔ n ɡwɛɡre, wii kohona ɡelɔ maa won biɡri kohona. Wahala nae ɡelɔ n ɡwɛɡre, hale n hoɡa bini sɔɔhnɔ.

¹¹ N dɔma we-ɛɛla ɡelɔ n bala aa men komɛl yerɛ. N daamanar bwa dɛ ɔm mɛ, ba na mɛ fɔɡbaahna aa, dɛ ba dɛ chwa.

¹² Ba soh n waa kɛŋɔ, maa sewa ken, n do kɛŋɔ vii waa paɡra.

¹³ N noɔ nɛra ɡalɡa ɛɛ ŋwalɛ ŋɔ, ɔmee kohona chole n nɛ. Ba dɛ vɔrɔwe n vɔrɔwa, dɛ́ kpo mɛ.

¹⁴ Kɛ n Naa Korowii, henee mɛɛ yarada, henee Korowii maa dɛ tomɛ.

¹⁵ Saŋ bɛlbwa, n lɔ he nɔn ta, lɛɛ mɛ le n dɔma, ne nɛra baa dɛ nyin bá chɔɡ mɛ nɔn ta.

¹⁶ Sune men maa ɛ he bonɔɔ nɛ, che he nyina aa wola jaɡa dɔe la ta, dɛ́ lɛɛ mɛ.

¹⁷ N Naa Korowii, bɛ ɡel sihiih kpo mɛ, henee n wi dɛɛ no. Gel sihiih kpo nyubinikpeɡ tena, ba serewe ka chɔ lalabwɛ jeiih ken.

¹⁸ Gel nyosonteŋna la nyoa sɔɔh, mbarafo tena baa wola waa bu, dɛ bol wobochɔɡa dɛɛ yaɡɛ nɛra ba wa aa toɡra la.

¹⁹ Nɛra baa dɛ ɔmɛ la, he kwaa kondɛɛɡa aa wera cheɡ ba. Nɛra baa chwaa baa marɛ la, he kpɔ waa aa wera dɛɛ tɛɛ ba.

²⁰ He kwaa ba dɛɛ sɔh he lɔɡa, dɛɛ le vɔrɔwa nɛnchɔɡa aa dɛ vɔrɔwe ba waa la wa. He laɡ ba dɛɛ sɔh he lɔɡa bela haa soɡa, dɛɛ lee ba ba dɔma chɛɡa nyoa.

²¹ N Naa Korowii, henee dɔ jam, dɛkalkɛ he baɡle he nyina kohona n nɛ, ɡɛ saŋ n dɔma aa bar mɛ cheme la.

²² N ɔmɔ dɛ lii kɛŋɔ, he doŋ mɛ le he sie. Kɛ maa wia noe ŋɔ he cha mɛ la, he sune n nɛ, dɛ cha mɛ.

²³ Korowii nɛra he wa aa toɡra, hé baɡle he nyina o nɛ. O kpɔ nɔn dɛɛ tɔ o nɛra ba wa aa dɔ kasinteŋ nɛ, kɛ mbarafo tena te, o dɛ tɛr ba deŋne ɡɛ aa chɛa.

²⁴ Nɛra haa dɛ hwɛɡɛ Korowii nɛɛ bwa, hé lawɛ bambile, dɛ́ che kiŋkiŋ.