Yela 30 - mzwDBL

Korowii jaama wesoŋa

Kooro Devid yel

¹ N Naa Korowii, mɛɛ kpɛɛree, dɛkalkɛ he lɛɛ mɛ, he ta ɡelɛ n dɔma mam mɛ.

² Korowii maa dɛ tomɛ, n wio noe kɛ he cha mɛ, asɛ he chaah mɛ,

³ dɛ lɛɛ mɛ le seo ta, he ta ɡelɛ n kaa lalabwɛ.

⁴ Korowii nɛra ba wa aa toɡra bwa, hé ɡo yela kpɛɛro, hé kpɛɛ o sɔn waa do ɡoroŋ la.

⁵ O baah diu waa, aa biɡri dɛ o sɔɔhnɔ, kɛ o nyina waa dɛ nyin nɛn lole saŋ bɛlbwa. Yaa won dɛɛ wi jwaana, kɛ tɔɔ ne pera dɛ silɛɛ ɡboo.

⁶ N fa aa dɔ bosɔɔhna la, n ŋɔ, “Wobɛlbwa aa won ɛɛ mɛ.”

⁷ N Naa Korowii, haa sune n nɛɛ la, he ɡelɔ n che kiŋkiŋ kɛŋɔ bwejen ken. Kɛ haa laa sie kpɔ n nɛɛ la, n ɔmɔ kohona.

⁸ N Naa Korowii, henee n wi dɛɛ yerɛ, n soŋe kɛ he na n sum ŋɔ,

⁹ “Dɛ n sewɔ ba huɡ mɛ naa, tɔnɔ besoo aa ba lee dɛ́ tɛɛ nɔ? Nɛn sewaa, wɛɛ won kpɛɛre ja aa? Wɛɛ won bol he wedɛɛɡa, aa wola jaɡa dɔe la waa ja aa?

¹⁰ N Naa Korowii, na n sum dɛ́ no n be. N Naa Korowii, cha mɛ!”

¹¹ He ɡelɔ n suna dii berɛ silɛɛ, mɛɛ sa, dɛ ɡel n soh n wii, dɛ kpɔ silɛɛ tɔ mɛ kɛŋɔ yal.

¹² Anomanta, maa nyoa tɔ, mɛɛ ɡo yelaa dɛ́ kpɛɛre. Korowii maa dɛ tomɛ, mɛɛ kpɛɛre saŋ bɛlbwa dɛɛ la.